Qeveria zyrtarizon spiunimin e kolegëve në qendrat e punës

Foto Ilustruese

Spiunimi i kolegëve tashmë është i zyrtarizuar me vendim qeverie. Ndryshe nga sa më parë, nuk do të keni më nevojë të pëshpëritni fshehurazi nëpër korridoret e vendit ku punoni.
Këshilli i Ministrave ka vendosur në mbledhjen e fundit që spiunimin e kolegëve për të cilët dyshoni se janë përfshirë në akte korruptive, ta bëni në një zyrë të posaçme, krijimi i së cilës do të jetë i detyrueshëm për institucionet shtetërore me më shumë se 80 punonjës. Nga ky detyrim nuk përjashtohen as sipërmarrjet private, por në këtë rast, pajisja me një zyrë spiunimi, bëhet e detyrueshme kur biznesi në fjalë ka mbi 100 punonjës.
Projektligji i miratuar nga qeveria, sigurisht ka një emër më të bukur dhe quhet “Për mbrojtjen e sinjalizuesve”. Këta, në draftin e qeverisë nuk cilësohen “spiunë”, përkundrazi, projektligji ofron për sinjalizuesit masa mbrojtëse nga çdo veprim hakmarrës i organizatës ku është i punësuar.
Drafti që Qeveria i dërgon Parlamentit vjen si propozim i ministrit për Çështjet Vendore, Bledi Çuçi, i cili është edhe koordinatori i luftës anti-korrupsion, si dhe ministrit të Drejtësisë, Ylli Manjani.
Në njoftimin përkatës për shtyp theksohet se ky mekanizëm synon t’i vijë në ndihmë Prokurorisë dhe Policisë në përmbushjen e atij që cilësohet si qëllimi i përbashkët për goditjen e korrupsionit.

/DRONI.al/