Arrestohet një shtetas në flagrancë për veprën penale “ Korrupsion pasiv në sektorin privat”
Burimet zyrtare të drejtorisë së Policisë së Lezhës, kanë bërë të ditur se dje, nga ana e specialistëve të Seksionit për Krimin Ekonomiko – Financiar në Drejtorinë Vendore të Policisë Lezhë, nga informacionet e siguruara në rrugë operative dhe ankesat e shtetasve arritën të arrestojnë në flagrancë 41-vjeçarin Genc Goci, banues në Fushë Mamurras – Kurbin, me detyrë punonjës i SHRSF “Gjoka” sh.p.k. pranë DRSHT,Rrugor, dega Laç.
Të njëjta burime saktësojnë se ky person, duke qenë me detyrë punonjës i SHRSF “Gjoka” pranë DRSHT, Rrugor, dega Laç, favorizonte mjete të ndryshme jashtë radhës për kryerjen e kontrollit teknik pranë SGS Laç, kundrejt shumave të ndryshme që variojnë nga 1000 – 3000 lekë (të reja).
Shërbimet policore kanë vepruar pas ankesave të shumta nga qytetarë të ndryshëm për radhët e gjata të krijuara pa shkak pranë këtij institucioni, moment i cili shfrytëzohej në funksion të akteve korruptive nga shërbime të rojeve private të caktuara në këtë institucion.
Në cilësinë e provës materiale iu gjetën dhe sekuestruan një shumë prej 7000 (shtatë mijë) lekë (të reja).
Materialet proçeduriale iu referuan Prokurorisë së Rrethit Gjyqësor Kurbin, për veprën penale “Korrupsion pasiv në sektorin privat“ parashikuar nga neni 164/b e Kodit Penal.
Lezhë, arrestohet polici privat për korrupsion, fuste pa radhë makinat për kolaudim
