Qeveria po studion mundësinë e bashkimit të Tatimeve me Doganat në një institucion të vetëm.
Zyrtarë të lartë në Ministrinë e Financave bëjnë të ditur se që prej vitit të kaluar është ngritur një grup pune që po shqyrton mundësinë e këtij bashkimi, duke studiuar përvojën e tri vendeve – Gjeorgjisë, Kanadasë dhe Suedisë, transmeton “Ora News”.
Të njëjtat burime shpjegojnë se nëpërmjet këtij bashkimi synohet një rritje e efekasitetit të punës së organeve fiskale dhe lehtësimi i burokracive për biznesin, të cilët do të trokisnin në një derë të vetme.
Por ky proces nuk duket të jetë i lehtë, edhe pse qeveria e ka premtuar në programin e saj. Kjo për shkak të nivelit të lartë të informalitetit në Shqipëri, por edhe problemeve me realizimin e të ardhurave.
Gjithashtu, janë shumë problematika që duhen zgjidhur, duke filluar nga ato ligjore, pasi një bashkim i mundshëm, do të kërkonte ndryshimin e disa ligjeve që rregullojnë aktualisht punën e Tatimeve dhe Doganave.
Problem mbetet edhe mënyra e bashkëpunimit, pasi duke qenë një eksperiencë e re në një periudhë afatshkurtër, mund të krijojë probleme.
Shkurtimi i numrit të punonjësve është një tjetër shqetësim që do të sillte bashkimi i dy administratave.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
