Prej sot ka hyrë në fuqi ndryshimi i Kodit Penal, i cili përfshin edhe veprën penale të futjes së sendeve të ndaluara në Institucionet e Ekzekutimit të Vendimeve Penale duke e dënuar atë me 3 vjet deri në 10 vjet burg.
Teskti i ri i nenit që parashikon këtë vepër penale është:
“Futja ose mbajtja e sendeve të ndaluara në institucionet e ekzekutimit të vendimeve me burgim, të cilat sipas legjislacionit në fuqi janë të ndaluara, dënohet me burgim nga një deri në tre vjet.
Po kjo vepër kur kryhet në bashkëpunim, më shumë se një herë ose nga personi që ka për detyrë ruajtjen dhe sigurinë fizike ose që për shkak të detyrës ose profesionit ka të drejtë të hyjë në institucione burgimi, dënohet me burgim nga pesë vjet deri në dhjetë vjet”.
Parandalimi i dukurisë problematike të futjes së sendeve të ndaluara në regjimin e vuajtjes së dënimeve, në veçanti i telefonave celularë, ka qenë një sfidë në veprimtarinë e Drejtorisë së Përgjithshme të Burgjeve. Kjo është bërë edhe më e vështirë kur punonjës të sigurisë apo stafit civil kanë qenë të përfshirë jo vetëm në krijimin e rrjeteve korruptuese, por edhe në bashkëpunimin që ata kanë patur me të paraburgosurit dhe të dënuarit për të futur në qeli dhe më pas shitur këta telefona celularë në vlera monetare të konsiderueshme.
Drejtoria e Përgjithshme e Burgjeve vlerëson, se një hap i tillë ligjor vjen në një moment të rëndësishëm të luftës kundër korrupsionit në sistemin e burgjeve, kur janë ndërmarrë disa iniciativa të mëparshme administrative për të zvogëluar fenomenin.
