Ministria e Mbrojtjes ka nxjerr në ankand 36 avionë luftarakë dhe katër helikopterë. Shitja e këtyre mjeteve luftarake do të bëhet për përdorim jo ushtarak, sqarohet në njoftimin e ministrisë. Ankandi do të jetë publik dhe do të organizohet më 22 shkurt tek Drejtoria e Ankandeve dhe Prokurimeve. Nga ky ankand Ministria e Mbrojtjes synon të nxjerrë mbi 61 milionë lekë nga shitja e tyre, sipas Panorama.
Avionët MiG – 19, janë më të shtrenjtët pasi kanë një çmim fillestar prej 1.9 milionë lekë. Në shitja janë 10 avionë të tillë të cilët ndodhen në bazën ajrore të Gjadrit.
Avionët MiG-19 janë prodhim rus i vitit 1953 që NATO i njeh me emrin “Fermeri”. Ata janë prodhim i gjeneratës së dytë, kanë vetëm një vend dhe janë më dy motorë. Ky ishte avioni i parë i Rusisë që mund të arrinte një shpejtësi supersonike në fluturim
Ndërsa avionët më të lirë janë Jak-18, ku janë nxjerr 6 të tillë në shitje dhe kanë një çmim fillestar prej 1.1 milionë lekë. Avionë të tillë ndodhen në bazën ajrore të Kuçovës.
Në shitje janë dhe katër helikopterë po rus, Mil Mi-4. Ky lloj helikopteri përdoret për shërbim ushtarak dhe civil për rol transportues.
Shqipëria ka pasur një flotë luftarake ajrore relativisht të madhe me avionë luftarakë, të tipeve MiG 15, MiG 17, MiG 19 dhe MiG 21.
Avioni MiG për herë të fundit ka fluturuar në Aeroportin e Kuçovës, në nëntor të vitit 2004.
Ministrja e Mbrojtjes znj. Mimi Kodheli, ka urdhëruar që në muajt e parë të 2015 fillimin e procedurave ligjore për shitjen me ankand për qëllime muzeale, skrap, etj, të stokut të avionëve “MiG” që Forcat e Armatosura të Shqipërisë kanë trashëguar prej Luftës së Ftohtë.
Avionët në fjalë pas demilitarizimit të tyre dhe pas veçimit të pjesës që do të mbahet për muzeumet shtetërore të vendit tonë, pjesa tjetër tashmë është ofruar për shitje me ankand koleksionistëve dhe të gjithë subjekteve të interesuar.
