Një pallat 13 katësh që po ndërtohet në fillim të parkut të liqenit në rrugën e Elbasanit është pronë e një kompanie indiane.
Bijo Srampiyil, qytetari indian qe zoteron kompanine ndertuese
Leja u dha në vitin 2014 nga qeveria e Ramës ndërsa vetë kompania ka të parin investim në vend, shkruan shqiptarja.com.
“Sipas dokumenteve të Qendrës Kombëtare të Regjistrimit, fjala është për një kompani të regjistruar më 6 qershor 2012 nga Bijo Srampiyil, qytetar indian, lindur në Otharawest të Indisë më 10 maj 1978 dhe banues në Xhebel Ali të Dubait në një nga parajsat e pakta fiskale, të mbetura në qarkullim në botë. Kompania-mëmë ka emrin Euro-Singaporean Real Estate and Trade Ltd, e cila më 8 gusht po të vitit 2012 krijoi në Shqipëri bijën e saj me emrin paksa të ndryshuar, po si një “shpk”. Një vit më pas, ortakët bëhen dy, pasi shtohet edhe një shqiptar: Denis Alimehmeti, që zotëron 20 përqind të aksioneve, duke i lënë gjithnjë të huajit paketën aksionare vendimmarrëse”, sipas gazetës.
Komapniën nuk e njeh askush në Shqipëri megjithatë ka marrë një “thelë” tejet të lakmuar në tregun e bllokuar të lejeve të ndërtimit, por edhe të drejtën të ndërtojë aty, ku shitja do të jetë e garantuar dhe fitimi marramendës.
Gazeta hedh dyshime se pas kësaj leje fshihen llogari bankare të dyshimta të regjistruara në të ashtuquajturat parajsa fiskale.
“Në këtë pikë, dyshimi përqendrohet tek biznesmenë, që lidhen me emrat e administratorëve të kompanisë-bijë, të regjistruar në Shqipëri, por ndoshta edhe në politikanë apo qeveritarë, që përdorin këta të fundit për të mbuluar investime jo të pastra”, shkruan gazeta.
