Ne foto, viktima Asllan Kertusha
Policia e Durrësit ndalon autorin e dytë të dyshuar të ngjarjes së datës 01.03.2016, ku mbeti i vrarë Kërtusha dhe u plagos një tjetër.
Policia ka ndaluar pronarin e lokalit ku ndodhi ngjarja , si një nga autorët e ngjarjes.
Specialistët e Sektorit kundër Krimeve të Rënda në Drejtorinë Vendore të Policisë Durrës, pas një pune intensive dhe në kohë rekord kanë bërë të mundur zbardhjen dhe dokumentimin e ngjarjes së ndodhur mbrëmjen e një marsit, ku pas një konflikti në ambjentet e një lokali mbeti i vrarë një shtetas dhe u plagos një tjetër.
Si rezultat, pas arrestimit të njërit prej autorëve menjëherë pas ngjarjes, më datë 02.03.2016, u ndalua pronari i lokalit, si njëri nga autorët e dyshuar, konkretisht, shtetasi:
• Gëzim Kajno, 31 vjeç, banues në Durrës.
Ndërkohë, menjëherë pas ngjarjes u arrestua shtetasi Bledar Kajno, 39 vjeç, banues në Xhafzotaj.
Mekanizmi i ngjarjes:
Më datë 01.03.2016, rreth orës 19:00, në lagjen Nr.17, pranë Ndërmarrjes së Ujësjellësit, shtetasit Gëzim dhe Bledar Kajno nën efektin e alkoolit dhe për motive të dobëta janë konfliktuar me shtetasin Asllan Kërtusha në ambjentet e brendshme të lokalit.
Më pas, në konfikt e sipër, kanë dalë jashtë lokalit ku shtetasi Gëzim Kajno e ka goditur më qytën e pistoletës në kokë shtetasin Asllan Kërtusha dhe si pasojë e një shkrepje të armës së zjarrit është plagosur në krah shtetasi Bledar Kajno.
Po me të njëjtën pistoletë, shtetasi Gëzim Kajno ka qëlluar Këtushën, i cili nga plagët e marra ka ndërruar jetë në Spitalin Rajonal Durrës.
Në vendngjarje, në cilësinë e provës materiale u gjetën dhe u sekuestruan:
• dy gëzhoja model 54 kalibri 7.62 m/m dhe
• 3 copë fishekë kalibri 7.62 m/m.
Asllan Kërtusha, 30 vjeç, banues në Durrës, është person më preçedentë penalë të mëparshëm duke konsumuar disa vepra penale si: vjedhje, në fushën e lëndëve narkotike, kundërshtim i Punonjësit të Policisë, konflikte në lokalet e natës si edhe ka pasur lidhje shoqërore me persona me preçedentë penalë.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale ”Vrasja me dashje në bashkëpunim” dhe” Prodhimi dhe mbajtja pa leje e armëve luftarake dhe e municionit”.
