Prokuroria e Përgjithshme krijon strukturën për zbatimin e ligjit “Për dekriminalizimin”.
Burime zyrtare nga organi qendror i akuzës, bëjnë të ditur se, “Prokurori i Përgjithshëm, Adriatik Llalla, ka firmosur Urdhrin për krijimin e strukturës së posaçme për verifikimin e integritetit të zyrtarëve publikë, në zbatim të ligjit të njohur ndryshe edhe si ligji ‘Për dekriminalizimin…’”.
Të njëjta burime saktësojnë se “Ligji ‘Për garantimin e integritetit të personave që zgjidhen, emërohen ose ushtrojnë funksione publike’ dhe Kreu VII i Vendimit të Kuvendit të Republikës së Shqipërisë nr. 17 datë 04. 03. 2016 ‘Për përcaktimin e rregullave të detajuara mbi zbatimin e ndalimeve të parashikuara në ligjin nr. 138/2015…, përcakton organin e Prokurorisë si institucioni përgjegjës për verifikimin e integritetit të zyrtarëve në të gjithë administratën publike”.
Bazuar në këto akte ligjore, mësohet se Prokurori i Përgjithshëm urdhëroi krijimin e Sektorit të Verifikimit të Integritetit të Personave që Zgjidhen, Emërohen ose Ushtrojnë Funksione Publike, i cili do të përbëhet nga 2 prokurorë, 3 oficerë të Policisë Gjyqësore dhe një specialist i Teknologjisë së Informacionit.
Në Urdhrin e Prokurorit të Përgjithshëm përcaktohen edhe detyrimet e punonjësve që do të jenë pjesë e Sektorit të Verifikimit. Sipas këtij akti, të dhënat dhe informacionet e grumbulluara në këtë proces trajtohen në përputhje me ligjin nr. 138/2015, me Vendimin e Kuvendit nr. 17 datë 04.03.2016, si edhe me legjislacionin në fuqi për mbrojtjen e të dhënave personale.
Po ashtu, çdo person që hyn, transmeton, përdor ose përpunon të dhënat e sistemit elektronik në kundërshtim me rregullat teknike dhe legjislacionin në fuqi, ngarkohet sipas rastit me përgjegjësi administrative ose penale.
Urdhri parashikon
– Krijimin e strukturës së posaçme për verifikimin e integritetit të zyrtarëve publikë, në zbatim të ligjit të njohur ndryshe edhe si ligji “Për dekriminalizimin…”.
– Krijimin e regjistrit për regjistrimin e kërkesave për verifikim dhe krijimin e regjistrit për regjistrimin e formularëve të vetë-deklarimit; si edhe,
– Krijimin e një sistemi elektronik për regjistrimin, ruajtjen dhe dokumentimin e kërkesave për verifikim, të dhënave, akteve apo fakteve të administruara, rezultatet e verifikimit dhe të dhënave të grumbulluara.
