Kushte të rrepta sigurie për tregtimin, ruajtjen dhe përdorimin e bombolave në Shqipëri. Një vendim i qeverisë ka përforcuar rregullat e përdorimit të gazit të lëngshëm përmes bombolave duke vendosur kritere të forta për tregtuesit dhe përdoruesit e tyre.
Në vendimin qeverisë për “ përcaktimin e kushteve dhe rregullave teknike për përpunimin bombolave të mbushur me gaz të lëngshëm të naftës” kërkohet që shoqëritë e tregtimit me shumicë, përpara futjes së bombolave të mbushura me GLN në treg, duhet të evidentojnë në sipërfaqen e bombolës të dhëna për markën tregtare të shoqërisë, peshën neto dhe bruto, të shprehur në kilogram, simbolin e flakës së ndezshme, vitin e prodhimit, datën e kontrollit teknik si dhe udhëzimin për përdorim të sigurtë të tyre.
Ndërkaq njësitë e tregtimit me pakicë depozitojnë bombolat e mbushura me GLN në një ambient të posaçëm, i cili duhet të jetë në katin zero dhe të mos ketë mbi dhe nën të ambiente të tjera.
Ndalohet që njësitë e tregtimit me pakicë të kryejnë ndërhyrje ndaj bombolave përsa i përket procesit të mbushjes, riparimit apo çdo forme tjetër që cenon tërësinë e bombolës.
Vendimi përcakton se temperatuara e ambientit në vendin e depozitimit të bombolave nuk duhet të kalojë 500C.
Pesha neto, maksimale, e bombolës së mbushur me GLN, që depozitohet në ambientet e njësive të tregtimit me pakicë, nuk mund të jetë më shumë se 25 kg ndërsa kapaciteti depozitues maksimal i ambienteve të njësive të tregtimit me pakicë është 1000 kg GLN.
Ndalohet mbushja e bombolave të GLN-së nga njësitë e tregtimit me pakicë, theksohet në vendim.
Për shkak të aksidenteve të shumta me bombola vendimi kërkon që instalimi i tyre duhet të jetë në ambiente të ajrosura, larg burimeve të nxehtësisë dhe instalimeve elektrike. Tubat e gomës, që lidhin bombolën me instalimin fiks, duhet të kenë tregues për afatin maksimal të përdorimit të tyre.
Disa nga rregullat e përcaktuara në vendim:
Instalimi i bombolave duhet të respektojë kërkesat, si më poshtë vijon:
a) Në ambiente me volum deri në 10 m3 është e ndaluar vendosja e bombolave;
b) Në ambiente me volum 10-20 m3 mund të instalohet një bombol me kapacitet 15 kg;
c) Në ambiente me volum 20-50 m3 mund të instalohen deri në 2 bombola, me kapacitet jo më shumë se 20 kg;
ç) Në ambiente me volum mbi 50 m3 mund të instalohen 2 bombola, me kapacitet total jo më shumë se 30 kg;
d) Kapaciteti total i bombolave të instaluara në një ambient familjar nuk duhet të jetë më i madh se 40 kg.
Konsumatorët e bombolave të GLN-së duhet të kenë të instaluar, në mjediset ku kanë instaluar dhe përdorin bombolat, sistem detektues e autobllokues të furnizimit me GLN.
