Atentatet me armë dhe eksploziv në kohën e klimës së miqësisë mes qeverisë dhe krimit

Vendi i vrasjes mbrëmë të Ajet Zeqaj në Tiranë

Kreu i Departamentit për Rendin në PD, Enkelejd Alibeaj, ka denoncuar valën e re të shpërthimeve, vrasjeve e plagosjeve.
Sipas tij, përkeqësimi i rendit e sigurisë e ka kthyer kryeqytetin dhe vendin në ditët më të keqe, të sundimit të bandave dhe kriminelëve.
“Një seri atentatesh dhe shpërthimesh me eksploziv kanë tronditur Tiranën, duke mbjellë terror e frikë e duke shtuar pasigurinë publike. Ky përkeqësim i rendit dhe i ligjit e ka kthyer kryeqytetin dhe vendin në ditën më të keqe të sundimit të bandave dhe kriminelëve.
Atentatet me armë e me eksploziv në mes të Tiranës vijnë në kohën e klimës së miqësisë dhe partneritetit që ekziston mes qeverisë, mes Edi Ramës e Saimir Tahirit me krimin.
Vetëm kjo e shpjegon lehtësinë me të cilën krimi hedh në erë me tritol dhe ekzekuton, në zemër të Tiranës, në një serial që përsëritet çdo ditë”, u shpreh Alibeaj.
Duke renditur ngjarjet e mbrëmshme kriminale, Alibeaj u shpreh se kjo valë e pahasur më parë e krimit, ka shqetësuar qytetarët por jo Ramën dhe Tahirin.
“Vetëm në 12 orët e fundit: një shpërthim tritoli te Rruga 5 Maji ndaj një biznesi, një atentat tek Komuna e Parisit ndaj një biznesmeni, një vrasje në zonën e ish bllokut. Ndërkohë që të dielën pati shpërthim me eksploziv te rruga e Kavajës dhe pranë stadiumit Qemal Stafa.
Valë e pahasur më parë e krimit, e rënies së rendit dhe sigurisë publike.
Qytetarët në Tiranë e mbarë vendin janë të shqetësuar. Vetëm Edi Rama jo, i cili ka prioritet luftën brenda partisë dhe tenderat e koncesionet për miqtë. I pashqetësuar nga kjo valë krimi është dhe Saimir Tahiri, i cili ka prioritet miqësinë e përfitimet prej krimit, dhe jo qytetarët e rendin publik”, përfundoi Alibeaj.

/DRONI.al/