Rasim Doda, ish-gjyqtari i Sarandës, ka akuzuar në mënyrë të drejtpërdrejtë ish-ministrin e Drejtësisë, Nasip Naço, si të implikuar në çështjen e tij, kur ky i fundit ishte në detyrë. Në seancën e zhvilluar në gjykatën e krimeve të rënda, këtë të premte, Doda ka prezantuar para trupit gjykues përgjimet e bëra ndaj ish-ministrit Naço dhe kallëzuesit Hasan Bushi, sipas vizionplus.
Në bisedë, Naço e falënderonte Bushin duke i thënë se me përgjimet që i ke bërë ish-gjyqtarit të Sarandës Rasim Doda, kë bërë një shërbim të madh drejtësisë. Por ish-ministri, sipas Dodës, i ka bërë këto biseda, kur ndaj ish-gjyqtarit të Sarandës nuk ka pasur asnjë urdhër ndalimi apo të ketë qenë nën përgjim nga Prokuroria.
Po kështu, Rasim Doda, akuzoi edhe kreun e gjykatës së Sarandës, Alltun Çela dhe punonjësin e IT të këtij institucioni, Ergi Hado, pasi këta shtetas kanë ndërhyrë në kompjuterin personal të gjyqtarit dhe kanë shkruar vetë dispozitivin e çështjes së kallëzuesit Bushi. Vetë i pandehuri i tha relatorit të çështjes Bib Ndreca se ai nuk i ka bërë asnjëherë dispozitivin me kompjuter por e shkruante me dore.
Prokurori e akuzon ish-gjyqtarin e Sarandës, se në këmbim të vendimit në favor të shtetasit Hasan Bushi ai i ka kërkuar atij 8 milionë lekë.
Seanca u shty për 1 prill, pasi trupi gjykues i kërkoi organit të akuzës të identifikojë personat e tjere të cilët janë përgjuar dhe që janë pjesë e hetimit.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
