KKT miraton Planin Rrregullues, procedurë jo transparente

Pas miratimit të planit rregullues në Tiranë nga Këshilli Kombëtar i Territorit, opozita ka reaguar në mënyrë kritike ndaj tij. Besnik Aliaj, urbanisti i njohur u shpreh në një status në profilin e tij në facebook se miratimi këtij plani është në shkelje të plotë të ligjeve në fuqi.
“Nga janar-dhjetori 2016 ky plan u hartua në fshehtësi të plotë dhe në kundërshtim me disa ligje dhe Kushtetutën. Alibia e “konsultimit” dhe miratimi në Këshill Bashkiak ishin në shkelje të plotë të ligjeve në fuqi dhe u krye brenda 48 orëve.
Pas nxitimit për ta miratuar planin në ditët e pushimeve të Krishtlindjeve dhe Vitit te Ri ku thuajse gjithë qyteti, media dhe institucionet ishin “pa mendje” ose thjesht nuk ishin present. Kaluan gati 4 muaj heshtje e plote dhe dje pa asnjë transparencë e krejt papritur plani u miratua si dash kurbani elektoral .
Pa u tharë mirë boja e firmës miratuese dolën në qarkullim edhe imazhet e para të disa prej shumë kullave që synohet të ndertohen dhe që do të shkatërrojne përfundimisht cdo shpresë për përmirësime të qenësishme të jetës dhe hapësirës publike, si dhe të rrugëve me kritike të aksesit në Tiranë. Edhe “investimet” e fundit në bulevarde, sheshe  dhe parqe nuk janë për ti shërbyer komunitetit por në funksion të plotë të këtyre investimeve e për të rritur vlerën e spekulimit imobiliar te oligarkëve!
Unë timen e bëra duke kontestuar me forcë publikisht këtë plan! Tani mbetet të verifikohen me kujdes një ditë nga organet ligjzbatuese diferencat midis dokumentit te planit te miratuar me urgjencë në Këshillin Bashkiak në dhjetor 2016 me dokumentin final të planit të miratuar në KKT në prill 2017! Jam i bindur që do të konstatohen hatara të mëdha!
Zoti e shpëtoftë Tiranën dhe qytetarët e saj më tej nga vizioni mafioz i kastës së pangopur politiko-oligarkë që hartoi dhe miratoi nje “plan” alibi me fasadë të jeshilosur ala renziane prej italie”,- ka përfunduar Aliaj.

/DRONI.al/