Kryeministri Rama dhe kryetari i Partisë Demokratike, Lulzim Basha, do të takohen sot pasdite në Pallatin e Kongreseve.
Në prag të takimit të sotëm midis krerëve të dy partive më të mëdha politike në vend, negociatat mes dy kampeve kanë vijuar deri në orët e vona të mbrëmjes së kaluar. Megjithatë, ende disa çështje kanë mbetur pezull për t’u zgjidhur sot paradite. Mësohet se deri mbrëmë vonë dy palët kanë qene duke diskutuar kryesisht për tre kërkesat e opozitës; modelin e vendeve të rezervuara, thjeshtimin e arkitekturës se sistemit dhe votimin elektronik në zgjedhjet e ardhshme.
Negociatorët Oerd Bylykbashi dhe Fatmir Xhafaj kanë pasur një fundjavë të ngjeshur negociatash për çështjet që do të diskutohen mes Ramës dhe Bashës. Ata kanë punuar për të hartuar një draft që do t’ia paraqesin dy liderëve politikë në tryezën e tyre, por ende mbeten çështje të pazgjidhura.
Ndërsa Partia Socialiste, përmes Kryeministrit Rama ka pranuar kërkesën e PD-së për zgjedhjen e anëtarëve të gjykatave me 2/3 e votave, ende mbetet pa zgjidhje kërkesa tjetër e demokratëve, ajo e vendeve të rezervuara. Përmes saj, në të gjitha institucionet e drejtësisë që do të zgjidhen nga Parlamenti, opozita dhe maxhoranca do të kenë vendet e tyre të përcaktuara.
Sot tryeza Rama – Basha, por ende s’është rënë dakord për draftin final
