Qytetarë nga mbarë Shqipëria dhe diaspora pritet t’i bashkohen këtë të shtunë protestës së 28-të kombëtare kundër qeverisë, e cila do të zhvillohet në Tiranë.
Organizatorët u kanë bërë thirrje shqiptarëve, brenda dhe jashtë vendit, të marrin pjesë në tubim, duke njoftuar se në protestë pritet të jenë të pranishëm edhe emigrantë të ardhur nga vende të ndryshme.
Sipas njoftimit, grumbullimi i protestuesve do të nisë në orën 19:00 në Sheshin “Skënderbej”, ndërsa më pas pjesëmarrësit do të marshojnë drejt godinës së Kryeministrisë, ku do të zhvillohet tubimi kryesor.
Kërkesa kryesore e protestës mbetet dorëheqja e kryeministrit Edi Rama. Organizatorët kanë deklaruar se protestat do të vijojnë deri në përmbushjen e kësaj kërkese, ndërsa u kanë bërë thirrje qytetarëve për një pjesëmarrje sa më të gjerë në protestën e 28-të radhazi.
