Drejtoria e Standardeve Profesionale në Drejtorinë e Përgjithshme të Policisë së Shtetit ka vendosur përjashtimin nga radhët e Policisë së Shtetit të ish-drejtorit të Policisë së Shkodrës, Gentian Berberi.
Vendimi nuk ka marrë ende formë të prerë, pasi pritet të shqyrtohet nga Komisioni i Apelimit. Berberi ishte pezulluar më herët nga detyra, ndërsa ndaj tij ishte zhvilluar një hetim disiplinor pas një incidenti të ndodhur në ambientet e Drejtorisë së Përgjithshme të Policisë së Shtetit.
Pas largimit nga drejtimi i Policisë së Shkodrës, për shkak të performancës së dobët në luftën kundër kultivimit të bimëve narkotike, ai ishte transferuar në sektorin e Analizës në Drejtorinë e Përgjithshme të Policisë.
Sipas informacioneve, Berberi është paraqitur në zyrën e drejtoreshës së Burimeve Njerëzore, ku dyshohet se ka përdorur gjuhë fyese dhe ka ushtruar presion verbal ndaj saj, duke shprehur pakënaqësinë për detyrën e re të caktuar.
Pas raportimit të ngjarjes, Drejtori i Përgjithshëm i Policisë së Shtetit, Skënder Hita, urdhëroi pezullimin e menjëhershëm të Berberit, ndërsa Drejtoria e Standardeve Profesionale nisi procedurat për hetimin disiplinor.
Ndërkohë, drejtoresha e Burimeve Njerëzore ka depozituar kallëzim penal pranë Agjencisë së Mbikëqyrjes Policore, duke pretenduar se është ofenduar dhe kërcënuar gjatë ushtrimit të detyrës.
Në përfundim të procedurës disiplinore është vendosur përjashtimi i Gentian Berberit nga Policia e Shtetit, ndërsa vendimi pritet të bëhet përfundimtar pas shqyrtimit nga Komisioni i Apelimit.
