SPAK dhe Prokuroria Antimafia e Barit në Itali kanë zhvilluar një operacion të përbashkët kundër një grupi kriminal të dyshuar për pastrim parash dhe transferim të paligjshëm të shumave cash mes Italisë dhe Shqipërisë.
Sipas të dhënave paraprake, në kuadër të hetimit janë lëshuar 14 masa sigurie, ku 10 prej tyre janë “arrest në burg”.
Nga masat e dhëna, gjashtë janë ekzekutuar në territorin italian, ndërsa katër të tjera në Shqipëri.
Hetimet janë zhvilluar përmes një Skuadre të Përbashkët Hetimore, të ngritur me koordinimin e Eurojust.
Sipas SPAK, anëtarët e grupit kriminal dyshohet se kanë qenë të përfshirë në transferimin e paligjshëm të parave nga Italia drejt Shqipërisë.
Autoritetet dyshojnë se drejtues i grupit ka qenë Igli Kamberi, i arrestuar në Hungari gjatë vitit 2025, si i dyshuar për përfshirje në vrasjen e një 26-vjeçari në Barleta të Italisë.
Ndërkohë, në Shqipëri është arrestuar Ergys Kastrati, së bashku me tre persona të tjerë, identitetet e të cilëve nuk janë bërë ende publike.
