Ish-funksionari i lartë publik, Agron Tare, u paraqit këtë të martë në ambientet e SPAK, ku u mor në pyetje për rreth 35 minuta në kuadër të një çështjeje hetimore. Në dalje nga Prokuroria e Posaçme, Tare kërkoi që të mos filmohej nga mediat, me pretendimin se nuk ishte “zyrtar publik”, por më pas reagoi ashpër ndaj gazetarit të SYRI TV, Fatjon Gjinaj.
Teksa gazetari po kryente detyrën duke filmuar daljen e tij nga SPAK, Tare humbi kontrollin dhe iu drejtua me fjalët “legen, kokrra e legenit”, duke shtuar edhe kërcënimin “do e shohim”.
Pretendimi i Tares se nuk duhej filmuar për shkak se nuk është funksionar publik bie ndesh me karrierën e tij të gjatë në administratën shtetërore. Ai ka mbajtur poste të rëndësishme si zyrtar në Ministrinë e Jashtme, drejtor i Zyrës së Minoriteteve, këshilltar i jashtëm i Edi Ramës në Bashkinë e Tiranës, anëtar i grupit negociator për Marrëveshjen e Stabilizim-Asociimit me Bashkimin Europian, Konsull i Përgjithshëm në Stamboll, drejtor i Portit të Durrësit dhe më pas zëvendësministër.
Paraqitja e Agron Tares në SPAK lidhet me hetimet për dosjen e ish-zëvendëskryeministres Belinda Balluku. Ai ishte thirrur për herë të dytë nga prokurorët, pasi edhe një javë më parë kishte dëshmuar si person në dijeni për rrethanat e çështjes. Në të njëjtën dosje përmendet edhe vëllai i tij, ish-futbollisti Igli Tare, i cili gjithashtu është subjekt i veprimeve hetimore.
Më herët, një emision investigativ ka publikuar materiale që flasin për një rol të mundshëm të vëllezërve Tare në procedura apo përfitime përmes firmave të lidhura me ish-ministren Balluku dhe kryeministrin Edi Rama.
Gazetari Fatjon Gjinaj reagoi pas incidentit, duke theksuar se interesi i medias për Agron Taren lidhet pikërisht me funksionet e larta publike që ai ka mbajtur ndër vite. Sipas tij, reagimi agresiv dhe gjuha denigruese ndaj medias përbëjnë një përpjekje për intimidim dhe shmangie të llogaridhënies publike.
