Strukturat e posaçme kundër korrupsionit dhe krimit të organizuar, SPAK dhe BKH, kanë ndërmarrë një aksion të gjerë për sekuestrimin e pasurive të biznesmenëve Ergys Agasi dhe Ermal Beqiri dhe personave të lidhur me të.
Sipas burimeve hetimore, janë vendosur në sekuestro një sërë asetesh që përfshijnë kompani, prona të paluajtshme, llogari bankare, aksione dhe kontrata të ndryshme. Mes kompanive të sekuestruara janë edhe subjekte të përfshira në hetimet për aferën e njohur të “AKSHI”, si dhe shoqëritë “A Solution” dhe “Soft Solution”.
Në kuadër të këtij operacioni është sekuestruar gjithashtu një skaf, i cili dyshohet se ishte në përdorim të Beqirit, por i regjistruar në emër të një personi të stafit të tij.
Po ashtu, masa e sekuestros është shtrirë edhe ndaj pasurive të Gezim Hoxha dhe Mirilinda Kercanaj.
Hetimet kanë zbuluar se në llogaritë bankare të katër personave janë identifikuar rreth 5 milionë euro, të cilat janë bllokuar me urdhër të autoriteteve. Ndër asetet e sekuestruara përfshihen edhe tre vila.
Operacioni vijon, ndërsa autoritetet po thellojnë hetimet për të zbardhur plotësisht burimin e pasurive dhe lidhjet e mundshme me veprimtari të paligjshme.m.k
