Policia e Tiranës ka finalizuar operacionin e koduar “Tools”, duke vënë në pranga një 42-vjeçar të dyshuar për vjedhje me kanosje.
Në pranga ka rënë shtetasi B. Sh., banues në Tiranë, i cili rezulton i dënuar më parë për vjedhje. Arrestimi i tij u bë në bashkëpunim me shërbimet e Drejtorisë Vendore të Policisë Durrës.
Sipas hetimeve, 42-vjeçari dyshohet se më 1 prill 2026, në rrugën “Kongresi i Manastirit”, ka grabitur xhiron ditore të një dyqani, duke kërcënuar punonjësen me thikë.
Gjatë operacionit janë sekuestruar edhe mjeti prerës dhe veshjet që dyshohet se autori ka përdorur gjatë kryerjes së krimit.
Policia bën me dije se vijon puna për të zbardhur nëse i arrestuari është i përfshirë edhe në vjedhje të tjera.
Materialet procedurale i janë referuar Prokurorisë së Tiranës për veprime të mëtejshme.
