Nënkryetari i Kuvendit dhe deputeti i Partisë Demokratike, Agron Gjekmarkaj, ka reaguar ashpër në rrjetet sociale lidhur me gjendjen e urës së Milotit, vetëm pak ditë pasi ajo u përurua pas ndërhyrjes për rikonstruksion.
Në reagimin e tij, Gjekmarkaj ngriti shqetësime për cilësinë e investimeve publike dhe standardet e punimeve në infrastrukturë, duke e lidhur situatën me, sipas tij, nivelin e lartë të korrupsionit dhe keqmenaxhimit.
Sipas deputetit demokrat, gjendja aktuale e urës, menjëherë pas përfundimit të punimeve, është një tregues i qartë i mënyrës se si menaxhohen fondet publike.
“Gjendja aktuale e urës së Milotit pas përurimit të investimit të pak ditëve më parë tregon qartë se Shqipëria po kaplohet nga korrupsioni dhe vjedhjet, duke e kthyer abuzimin në normë”, shkroi Gjekmarkaj, duke u bërë thirrje institucioneve përgjegjëse të reagojnë dhe të garantojnë sigurinë e qytetarëve.
Ura e Milotit kishte qëndruar e mbyllur për rreth tetë muaj për shkak të dëmtimeve serioze që rrezikonin kalimin e mjeteve dhe qytetarëve. Pas rikonstruksionit dhe përurimit më 19 mars, vetëm dy javë më vonë janë konstatuar sërish dëmtime, duke rikthyer debatet mbi cilësinë e investimeve dhe mirëmbajtjen e infrastrukturës rrugore.a.n
