Drejtuesi i Departamentit për Mbrojtjen e Familjes në Partinë Demokratike, Aulon Kalaja, ka bërë deklarata të forta në lidhje me çështjen e zëvendëskryeministres Belinda Balluku, duke deklaruar se dosja ndaj saj nuk është dërguar nga opozita në Gjermani, por nga vetë deputetë të Partisë Socialiste.
I ftuar në emisionin “Task Forcë” në SYRI TV, të moderuar nga Sonila Meço, Kalaja u shpreh se përfshirja e Gjermanisë në këtë çështje dhe përmendja me emër e Ballukut nga zyrtarë europianë është një zhvillim i pazakontë në diplomaci dhe, sipas tij, tregon për përçarje të brendshme në mazhorancë.
Sipas tij, për herë të parë një shtet si Gjermania përmend me emër një zyrtare të lartë shqiptare në kontekstin e problemeve që lidhen me rrugën e vendit drejt Bashkimit Europian. Kalaja iu referua deklaratave të eurodeputetit gjerman David McAllister, i cili sipas tij e ka cilësuar çështjen e Belinda Ballukut si një nga gurët e themelit për ecurinë e Shqipërisë drejt integrimit europian.
Kalaja theksoi gjithashtu se, sipas informacioneve që ai pretendon se disponon, dosja për Ballukun është dërguar në Gjermani nga vetë deputetë socialistë dhe jo nga opozita.
Sipas Kalasë, në dosje ekzistojnë materiale dhe prova që lidhen me figura të rëndësishme të qeverisë, ndërsa ai u shpreh i habitur për mungesën e veprimeve të deritanishme nga ana e Prokurorisë së Posaçme.
Ai shtoi gjithashtu se brenda Partisë Socialiste ka grupe të ndryshme ndikimi dhe se, sipas tij, Belinda Balluku zotëron një mbështetje të konsiderueshme në grupin parlamentar, çka mund të ndikojë në balancat e brendshme të mazhorancës.
Kalaja përfundoi duke theksuar se situata politike brenda PS-së është e ndërlikuar dhe se zhvillimet e fundit mund të tregojnë për tensione dhe rivalitete të brendshme në mazhorancë.a.b
