Ish-drejtoresha e Kadastrës, Dallëndyshe Bici është marrë në pyetje këtë të martë në ambientet e SPAK për rreth dy orë, në kuadër të hetimeve që po zhvillohen për aferën që lidhet me AKSHI.
Sipas hetimeve paraprake, në këtë institucion dyshohet se ka vepruar një grup i strukturuar kriminal, i drejtuar nga dy biznesmenët e shpallur në kërkim, Ergys Agasi dhe Ermal Beqiri.
Burime bëjnë me dije se gjatë marrjes në pyetje, ish-zyrtarja është pyetur në lidhje me procedurat e legalizimit dhe regjistrimit të një vile në periferi të Tiranë, e cila rezulton në emër të biznesmenit Ergys Agasi.
Bici ka qëndruar në SPAK afro dy orë ndërsa në dalje shmangi mediat.
Ndërkohë, ditët e fundit SPAK ka ndërmarrë edhe kontrolle në disa prona që dyshohet se lidhen me këtë çështje. Mes tyre janë vila luksoze në pronësi të Agasit, si dhe apartamente e vila që dyshohet se janë pasuri të fshehura të ish-drejtoreshës së AKSHI-t, Mirlinda Karçanaj.
