Kuvendi i Shqipërisë pritet të zhvillojë të enjten seancën plenare të radhës, ku një nga pikat kryesore në rendin e ditës do të jetë shqyrtimi i projektvendimit për dhënien e autorizimit për arrestimin ose heqjen e lirisë së deputetes Belinda Balluku.
Sipas rendit të publikuar të punimeve, në pikën e tretë të seancës është parashikuar shqyrtimi i projektvendimit “Për dhënien e autorizimit nga Kuvendi për arrestimin/heqjen e lirisë së deputetes Belinda Balluku, nëpërmjet zëvendësimit të masës së sigurimit”.
Procedura mbështetet në nenin 73 të Kushtetutës së Republikës së Shqipërisë dhe në nenet 13 dhe 118 të Rregullores së Kuvendit, ndërsa për miratimin e projektvendimit kërkohet një shumicë e thjeshtë votash në sallën e parlamentit.
Gjatë shqyrtimit të kësaj çështjeje në seancën plenare do të ndiqen disa hapa procedurialë. Fillimisht është parashikuar fjala e vetë deputetes Balluku, më pas paraqitja e raportit nga pakica parlamentare përmes anëtarëve të Këshillit për Rregulloren, Mandatet dhe Imunitetin, si dhe raporti i shumicës parlamentare nga i njëjti këshill. Në përfundim të diskutimeve, deputetët do të kalojnë në votimin e projektvendimit.
Seanca e së enjtes pritet të zhvillohet në një klimë të tensionuar politike, pasi çështja e imunitetit të deputetes Balluku është kthyer në një nga temat më të debatueshme në skenën politike të ditëve të fundit.
Edhe pse rendi i ditës parashikon që deputetja të ketë mundësinë të mbajë fjalën e saj para kolegëve në sallë, ende nuk dihet nëse ajo do të zgjedhë të flasë gjatë seancës.
Ndërkohë, opozita ka njoftuar organizimin e një proteste jashtë godinës së Kuvendi i Shqipërisë në të njëjtën ditë kur do të zhvillohet seanca plenare.
