Kryetari i Partisë Demokratike, Sali Berisha, ka zhvilluar një takim me deputetin e Christian Democratic Union of Germany në Bundestagun gjerman, Peter Beyer. Pas takimit, Berisha foli për mediat duke bërë të ditur se në bisedë është diskutuar situata aktuale politike në Shqipëri.
Sipas kreut të opozitës, gjatë takimit ai e ka informuar Beyer, i cili është raportues për Shqipërinë në CDU, mbi zhvillimet politike dhe institucionale në vend, si dhe mbi qëndrimet e opozitës për proceset kryesore që lidhen me të ardhmen e vendit.
Berisha theksoi se opozita shqiptare mbetet e vendosur në mbështetje të procesit të integrimit europian, duke e cilësuar atë si projektin më të rëndësishëm për të ardhmen e Shqipërisë dhe të qytetarëve shqiptarë.
“Zhvillova një takim me deputetin Peter Beyer, një njohës i mirë i Shqipërisë dhe i rajonit tonë. E falënderova për interesin dhe mbështetjen që Bundestagu, CDU dhe qeveria gjermane i kanë dhënë Shqipërisë dhe shqiptarëve ndër vite, si dhe për vëmendjen ndaj zhvillimeve në vend”, u shpreh Berisha.
Ai shtoi se gjatë bisedës ka paraqitur edhe shqetësimet e opozitës lidhur me situatën aktuale në Shqipëri. Sipas tij, ndër problemet kryesore mbetet bllokimi i sistemit të drejtësisë, si dhe ndikimi i krimit të organizuar dhe karteleve të drogës.
Kreu i Partisë Demokratike deklaroi se opozita është e vetëdijshme për vështirësitë me të cilat përballet vendi, por theksoi se do të vijojë përpjekjet për të realizuar projektet dhe reformat që, sipas tij, janë të nevojshme për zhvillimin e Shqipërisë dhe për avancimin drejt integrimit në Bashkimin Europian. a.b
