Forcat Ajrore të Izraelit kanë ndërmarrë një tjetër valë sulmesh ndaj objektivave strategjikë në Teheran, duke goditur kryesisht infrastrukturën e naftës së Iranit.
Lajmi u konfirmua nga Forcat Mbrojtëse të Izraelit (IDF), të cilat njoftuan se operacioni kishte në shënjestër objekte që lidhen me infrastrukturën energjetike të regjimit iranian në kryeqytet.
Sipas zyrtarëve izraelitë, gjatë sulmit janë goditur disa objektiva të rëndësishëm, ndërsa në rrjetet sociale janë publikuar edhe video të shumta që pretendohet se tregojnë momentet e shpërthimeve në zona të ndryshme të Teheranit.
Raportohet se kjo është hera e parë që nga nisja e përshkallëzimit të fundit të konfliktit që Izraeli godet drejtpërdrejt infrastrukturën kombëtare të Iranit, veçanërisht sektorin e naftës.
Në një deklaratë të fundit, IDF bëri të ditur se operacionet ushtarake janë ende në zhvillim dhe se një valë e re sulmesh është nisur ndaj infrastrukturës së regjimit iranian në kryeqytet. Autoritetet izraelite pritet të publikojnë më shumë detaje në vijim.
