Sipas një raportimi të The New York Times, pas muajsh mbikëqyrjeje intensive, CIA i kishte dorëzuar Izraelit informacione të detajuara dhe të konsideruara shumë të besueshme se Udhëheqësi Suprem i Iranit, Ali Khamenei, do të merrte pjesë në një takim me zyrtarë të lartë në Teheran ditën e shtunë.
Në të njëjtën kohë, inteligjenca izraelite kishte konfirmuar se takimi do të zhvillohej në kompleksin rezidencial ku ai banonte. Fillimisht, sipas një burimi amerikan, takimi ishte planifikuar për mbrëmje, por shërbimet izraelite zbuluan se ai do të mbahej në orët e paradites, çka krijoi një mundësi të papritur për ndërhyrje.
Pas këtij zhvillimi, Uashingtoni dhe Tel Avivi vendosën të përshpejtonin operacionin, duke e sinkronizuar sulmin me mbledhjen e rrethit të ngushtë të Khameneit. Burime izraelite pohuan se agjencitë e inteligjencës kishin identifikuar disa takime të njëkohshme të nivelit të lartë, çka çoi në aktivizimin e menjëhershëm të operacionit.
Rrjeti televiziv Channel 12 raportoi se rreth 30 bomba u hodhën mbi kompleksin ku ndodhej Khamenei. Sipas të njëjtit burim, ai gjendej në një strukturë nëntokësore në momentin e sulmit.
Përveç Khameneit, në sulmin e përbashkët amerikano-izraelit u raportua se humbën jetën edhe anëtarë të familjes së tij, përfshirë vajzën, dhëndrin dhe mbesën.
Autoritetet iraniane konfirmuan gjithashtu vdekjen e disa prej figurave më të larta ushtarake të vendit: Gjeneralit Mohammad Pakpour, kreu i Gardës Revolucionare; Gjeneral Lejtnant Saeed Abdolrahim Mousavi, Shefi i Shtabit të Përgjithshëm të Forcave të Armatosura; si dhe Admiralit Ali Shamkhani, këshilltar i Komandantit Suprem dhe Sekretar i Këshillit të Mbrojtjes.
Ndërkohë, kryeministri izraelit Benjamin Netanyahu deklaroi se “shumë udhëheqës” të lidhur me programin bërthamor iranian u eliminuan gjatë operacionit.
Mediat iraniane raportuan se nga sulmet fillestare u regjistruan 201 viktima dhe 747 të plagosur, ndërsa mes të prekurve thuhet se janë edhe më shumë se 100 fëmijë në një shkollë të goditur nga bombardimet. a.b
