Presidenti i SHBA-së, Donald Trump, deklaroi në një intervistë për NBC News se beson se raportet për vrasjen e Udhëheqësit Suprem të Iranit, Ali Khamenei, gjatë sulmeve ajrore janë të sakta.
Trump tha se “shumica” e udhëheqjes së lartë iraniane është zhdukur. “Njerëzit që marrin të gjitha vendimet, shumica e tyre janë zhdukur”, u shpreh ai.
I pyetur se kush mund ta zëvendësojë Khamenein, presidenti amerikan u përgjigj: “Nuk e di, por në një moment do të më telefonojnë për të më pyetur se kë do të doja”, duke shtuar se ishte “vetëm pak sarkastik” me këtë koment.
Raportimet e fundit nga mediat izraelite dhe agjencia Reuters citojnë një zyrtar të lartë izraelit, sipas të cilit Ajatollah Ali Khamenei ka vdekur dhe trupi i tij është gjetur. Deri tani nuk ka një konfirmim zyrtar nga autoritetet iraniane për fatin e tij.
Në reagimin e parë, media shtetërore iraniane ka cituar kreun e marrëdhënieve me publikun në zyrën e Khameneit, i cili ka deklaruar se “armiku po përdor luftë mendore” dhe ka paralajmëruar qytetarët për kujdes ndaj informacionit që qarkullon.
Edhe kryeministri i Izraelit, Benjamin Netanyahu, ka sugjeruar se Khamenei mund të jetë vrarë në një sulm të përbashkët të SHBA-së dhe Izraelit, duke theksuar se objektiv i goditjeve ishte kompleksi i tij në kryeqytetin iranian, Teheran.
Udhëheqësi Suprem iranian nuk është parë në publik që prej nisjes së operacionit të shtunën. Ndërkohë, Ministria iraniane e Kulturës ka njoftuar mediat vendase se raportimet për një fjalim të mundshëm të Khameneit nuk janë të sakta dhe se qytetarët duhet të ndjekin vetëm njoftimet zyrtare nga kanali shtetëror IRIB ose burimet zyrtare të Teheranit. m.k
