Kreu i PD, Sali Berisha fton qytetarët në protestë ndërsa thekson se sot inaugurojnë fillimin e betejës për përmbysjen përfundimtare të Edi Ramës.
“Këto pak orë që na ndajnë nga protesta që inauguron fillimin e betejës për përmbysjen përfundimtare të Edi Ramës dhe narkoshtetit të tij, ftoj çdo demokrate e demokrat, çdo qytetare e qytetar, të dalin në sheshin e betejës.
Të vijnë në Tiranë.
Të bindim çdo shqiptare dhe shqiptar se një mision i madh na pret.
Se ky mision është shansi i jetës për çdo qytetar të këtij vendi.
Shansi i përmbysjes njëlloj si në Bangladesh, Nepal, Sri Lanka të diktatorëve autokratë, të cilët pasi vjedhin dhe plaçkisin miliarda kombet e tyre, ia mbathin si armiq në vende të tjera.
22 dhjetori është një ditë e shënuar.
Është një ditë që fton çdo shqiptar”, tha Berisha.
Ftesa ime për Lapajn dhe të gjithë partitë opozitare është që të bashkohemi kundër kësaj të keqe të madhe, tha Berisha.
“Lapaj ka pasur, ka dhe do ketë mbështetjen time për sa kohë gjendet në protestë.
Dhe jo vetëm Lapaj, por cilido qytetar shqiptar që proteston kundër kësaj qeverie, ka dhe do ketë mbështetjen time.
Ftesa ime për Lapajn dhe të gjithë partitë opozitare është që të bashkohemi kundër kësaj të keqe të madhe.
Përndryshe, kuptohet, kryetari i një partie ka projektin e tij.
Unë këtë nuk mund të them.
Por ftesa është e hapur”, tha kreu i PD.
Në vijim Berisha ftoi të gjitha forcat politike opozitare në protestë.
“Ftoj të gjitha forcat politike opozitare, të gjithë ata që ndjehen opozitarë, pavarësisht nga dallimet që kemi, të bashkohemi sot, për t’u dëshmuar shqiptarëve dhe botës se nuk ka forcë që na ndalon dhe na pengon pa përmbysur regjimin më armiqësor, më të keq që shqiptarët kanë njohur në histori.
Unë kam besim të madh se Tirana po zien, se Shqipëria po zien dhe se protesta e sotme do të shënojë kthesën e madhe.
Do të shënojë kthesën drejt fitores të çdo qytetari të këtij vendi për dinjitetin e tij, për familjen e tij, për të ardhmen, por edhe për vendin dhe kombin e tij”, përfundoi Berisha apelin e tij. a.b
