Një pjesë e armëve të gjetura në banesën e Zallës
Zbulohet arsenal armësh në Fushë-Krujë, ndërsa shpallet në kërkim 48-vjeçari me precedentë penalë dhe i skeduar për rekrutime në ISIS. Policia ka dyshime për lidhje të tij me atentatin në Rinas për shkak se dyshohet se makina e atentatit doli nga banesa e tij.
Ylli Zalla, 48 vjeç, i cili u shpall në kërkim pasi policia zbuloi në banesën e tij një arsenal të madh armësh, lëndësh plasëse dhe municionesh. Zalla rezulton me precedentë të rëndë penalë, pasi më herët është arrestuar për mbajtje arsenali armësh, prodhim lëndësh plasëse dhe vendosje eksplozivi.
Burimet bëjnë me dije se ai është i skeduar gjithashtu për përfshirje në rekrutimin e shqiptarëve drejt ISIS-it. Po ashtu, Zalla ka qenë i hetuar edhe për kërcënimin me jetë të ish-pronarit të fabrikës së çimentos, ngjarje e ndodhur disa vite më parë.
DETAJET/ Policia e Tiranës, në bashkëpunim me Komisariatin e Krujës, ka zhvilluar operacionin e koduar “Tracking”, i cili vijon ende në terren, në kuadër të hetimeve për atentatin e datës 11.11.2025 pranë rrethrrotullimit të Rinasit.
Gjatë kontrollit në një banesë në fshatin Zall të Fushë-Krujës, efektivët zbuluan një sasi të konsiderueshme armësh dhe lëndësh të rrezikshme:
- 3 kallëpe tritol
- 12 granata dore sulmuese
- Lëndë plasëse të gatshme për shpërthim, të montuara me kapsolla, fitila dhe celularë
- 3 ndezës granatash, kapsolla detonatore dhe 5 celularë
- 4 armë zjarri (2 automatikë dhe 2 pushkë), 8 krehra dhe pjesë armësh
- 6000 fishekë të kalibrave të ndryshëm
- 2.25 kg cannabis
Si rezultat, Ylli Zalla, pronari i banesës, u shpall në kërkim dhe po punohet intensivisht për kapjen e tij. Autoritetet po hetojnë gjithashtu lidhjet e mundshme të 48-vjeçarit me atentatin e ndodhur pranë Rinasit. a.b
