Shtyhet seanca paraprake për Erion Veliajn, vijon më 17 nëntor.
Seanca paraprake ndaj kryebashkiakut të Tiranës, Erion Veliaj, është shtyrë për në datën 17 nëntor. Në seancën e sotme, që zgjati rreth dy orë, prokurori i posaçëm Altin Dumani lexoi parashtresat e tij, duke kërkuar kalimin e çështjes për gjykim. Në seancën e ardhshme pritet që mbrojtja e të pandehurve të paraqesë konkluzionet.
Veliaj nuk ishte i pranishëm në sallë dhe u përfaqësua nga avokati i tij, Artan Gjermeni. Gjithashtu, mungoi edhe prokurori Ols Dado, ndërsa procesi u zhvillua vetëm nga Dumani, nën drejtimin e gjyqtares Etleva Deda, e cila është caktuar me short si gjyqtare paraprake.
Në përfundim të këtij procesi, Gjykata e Posaçme do të vendosë nëse çështja ndaj Veliajt do të kalojë për gjykim apo do të pushohet.
Në këtë dosje, përveç kryebashkiakut Veliaj, janë përfshirë edhe bashkëshortja e tij Ajola Xoxa, si dhe 28 persona e shoqëri të tjera. Veliaj akuzohet për një sërë veprash penale, përfshirë pastrimin e parave, mosdeklarimin e pasurisë, korrupsion pasiv në 9 episode, shpërdorim detyre dhe futjen e sendeve të ndaluara në qeli.
Ndërsa Ajola Xoxa akuzohet për mosdeklarim pasurie, fshehje të të ardhurave dhe pastrim parash. Në listën e të pandehurve është gjithashtu edhe ish-deputetja socialiste Klotilda Bushka, e akuzuar për veprime që pengojnë zbulimin e së vërtetës.
