Florjan Binaj pas takimit
Kandidati i pavarur për Bashkinë e Tiranës, Florjan Binaj, i mbështetur nga forcat opozitare, zhvilloi këtë të martë takimin e parë me koordinatorët e partive që i janë bashkuar nismës së tij.
Në një prononcim pas takimit, Binaj e cilësoi mbledhjen si të frytshme, duke theksuar se bashkëpunimi me grupet opozitare do të vijojë në ditët në vijim, ndërsa programi për kryeqytetin po hartohet nga një ekip i pavarur profesionistësh.
“Sot zhvilluam takimin me përfaqësuesit dhe koordinatorët e opozitës. Ishte një takim shumë i frytshëm për t’u koordinuar me njëri-tjetrin. Ne jemi të gjithë bashkë dhe, si kandidat i pavarur me mbështetjen e partive opozitare, u bëj thirrje qytetarëve të na bashkohen pa dallim partie, sepse kjo është një çështje që i përket të gjithëve. Po punojmë me një ekip jopartiak dhe së shpejti do të paraqesim programin tonë për qytetin”, deklaroi Binaj.
I pyetur nga gazetarët nëse ka pasur kontakte me kreun e Partisë Demokratike, Sali Berisha, Binaj u shpreh se deri tani nuk ka komunikuar me të.
“Nuk kam folur me zotin Berisha dhe e kam bërë të qartë që gjatë fushatës do të jem pa përfaqësimin e kryetarëve, por jam i gatshëm të takoj çdo drejtues të partive opozitare”, tha ai.
Binaj shtoi se mbështetja e gjerë opozitare është tregues i frymës së bashkimit që po krijohet:
“Ky bashkim që po ndodh tani është një sinjal i fortë për atë që pritet të ndodhë. Jam kandidat i pavarur, i mbështetur nga të gjitha partitë e opozitës, dhe nëse kjo mbështetje shihet si varësi, atëherë jam i varur nga të gjitha – nga Partia e Lirisë, nga Nisma Thurje, nga Shqipëria Bëhet dhe çdo forcë që beson në ndryshim”, u shpreh ai. a.b
