Zgjedhjet lokale të 12 tetorit në Kosovë kanë mbyllur rundin e parë me rezultate të fragmentuara, pa fitues absolut. Sipas të dhënave preliminare të Komisionit Qendror të Zgjedhjeve (KQZ), në 21 komuna gara përfundoi që në rundin e parë, ndërsa në 17 të tjera do të zhvillohet balotazh më 9 nëntor. Dalja në votime ishte nën 40 për qind, më e ulët se në vitin 2021.
Fitoret në rundin e parë
Lëvizja Vetëvendosje (LVV) siguroi fitoren në tri komuna: Podujevë, Kamenicë dhe Shtime. Po aq komuna fitoi edhe Partia Demokratike e Kosovës (PDK) – Ferizaj, Skënderaj dhe Hani i Elezit. Lidhja Demokratike e Kosovës (LDK) doli fituese në Lipjan dhe Istog, ndërsa Aleanca për Ardhmërinë e Kosovës (AAK) fitoi në Deçan, dhe Nisma në Malishevë. Në Mamushë fitoi kandidati i Partisë Demokratike Turke të Kosovës (KDTP), kurse në Drenas triumfoi Lista e Ramiz Lladrovcit.
Lista Serbe fitoi në nëntë komuna me shumicë serbe, ndërsa në Kllokot prin, por do të shkojë në balotazh me Unitetin Kombëtar Serb.
Balotazhi më 9 nëntor
LVV do të garojë në 12 komuna të tjera – në dy prej tyre si forcë e parë dhe në 10 të tjera si e dytë.
LDK do të jetë në balotazh në nëntë komuna (gjashtë si forcë e parë dhe tre si e dytë).
PDK garon në gjashtë komuna, katër prej të cilave i udhëheq pas rundit të parë, ndërsa në dy është e dyta.
AAK do të garojë në pesë komuna – katër si e para dhe një si e dyta.
Prishtina dhe Mitrovica, garat më të forta
Në Prishtinë, LDK doli e para duke lënë pas LVV-në dhe PDK-në. Kjo u cilësua si surpriza më e madhe e zgjedhjeve, pasi pritej një garë më e ngushtë mes LVV-së dhe PDK-së.
Në Mitrovicën e Jugut, beteja ndërmjet PDK-së dhe LVV-së përfundoi pa fitues, duke kaluar në balotazh.
Analizat politike
Sipas analistëve, rezultatet tregojnë një shpërndarje të balancuar të pushtetit vendor. Artan Muhaxhiri vlerëson për radion Evropa e Lirë se “asnjë parti nuk mund të shpallet fituese absolute”, ndërsa Besar Gërgi nga GSLP thekson se rënia e përkrahjes për Vetëvendosjen është më e dukshme në Prishtinë.
PDK ruajti bastionet tradicionale si Ferizaj e Skënderaj, ndërsa LDK forcoi pozitat në kryeqytet. AAK konfirmoi bazat e saj në komunat ku ka qeverisur më parë, pa arritur zgjerim të ri.
Skenari i balotazhit
Në 17 komunat ku gara do të vazhdojë, fitorja e raundit të parë nuk garanton sukses në raundin e dytë. Balotazhi mund të sjellë marrëveshje të reja mes partive, përfshirë prishjen e “vijave të kuqe”, siç ndodhi në zgjedhjet e vitit 2021 në Gjilan, kur LVV mori mbështetjen e PDK-së.
