Gjykata Kushtetuese rrëzoi sot dekretin e Presidentit Bajram Begaj për zgjedhje lokale në Tiranë. Ajo ka vendosur në mënyrë unanime që të kalojë për shqyrtim në seancë plenare publike çështjen me kërkues Erjon Veliaj, duke caktuar datën 31 Tetor 2025 për këtë seancë.
Në vendimin e saj, Gjykata ka urdhëruar gjithashtu pezullimin e Dekretit të Presidentit për pjesën që cakton datën e zgjedhjeve në Bashkinë Tiranë.
Për pesë bashkitë e tjera, procesi zgjedhor do të vijojë normalisht, ndërsa vetëm në Tiranë është pezulluar zbatimi i dekretit deri në shqyrtimin përfundimtar të çështjes.
Sipas vendimit të Gjykatës Kushtetuese, ajo vendos “Pranimin për shqyrtim në seancë plenare publike të kërkesës së paraqitur nga Erjon Veliaj më datë 31 Tetor 2025 si dhe pezullimin e zbatimit të Dekretit të Presidentit të Republikës vetëm për pjesën që ka të bëjë me caktimin e datës së zgjedhjeve në Bashkinë Tiranë, deri në marrjen e një vendimi përfundimtar. Për pesë bashkitë e tjera, procesi zgjedhor vijon normalisht.”
Ky vendim i Gjykatës Kushtetuese vjen si përgjigje ndaj një kërkese të paraqitur nga Erjon Veliaj, lidhur me dekretin e Presidentit për përcaktimin e datës së zgjedhjeve në bashkitë e vendit. Kjo masë pezulluese vlen ekskluzivisht për Bashkinë Tiranë, duke mos ndikuar proceset në pesë bashkitë e tjera.
PJESË NGA VENDIMI/ Gjykata Kushtetuese, me trupë të plotë, bazuar në nenin 115 të Kushtetutës, pasi shqyrtoi kërkesën e Erion Veliajt në lidhje me dekretin e Presidentit të Republikës për caktimin e datës së zgjedhjeve në Bashkinë e Tiranës,
VENDOSI:
• Pranimin për shqyrtim në seancë plenare publike të kërkesës së paraqitur nga Erion Veliaj, duke caktuar datën 31 Tetor 2025 për zhvillimin e kësaj seance.
• Pezullimin e Dekretit të Presidentit të Republikës “Për caktimin e datës së zgjedhjeve” vetëm për pjesën që ka të bëjë me Bashkinë Tiranë, deri në marrjen e vendimit përfundimtar të Gjykatës Kushtetuese.
• Sa i takon pesë bashkive të tjera të përfshira në dekret, procesi zgjedhor do të zhvillohet sipas kalendarit të shpallur.
Arsyetim i vendimit:
Trupa gjykuese vendosi se përsa kohë është paraqitur një ankim për shkelje të kompetencave kushtetuese mes organeve më të larta të shtetit, është në tagrin e gjykatës të shqyrtojë në themel çështjen në seancë publike, duke garantuar pezullimin e veprimeve për sa kohë nuk është dhënë një vendim përfundimtar. Për Bashkinë Tiranë procesi pezullohet, ndërsa për pesë bashkitë e tjera vijon normalisht.
