Kababisi legal, 10 zonat e caktuara për ferma të narkotikut. Më shumë në Libohovë dhe Tropojë

Janë mësuar 10 zonat në Shqipëri të piketuar për mbjelljen e hashashit të qeverisë.

Emisioni “FactCheck” i gazetarit Arsen Rusta në mcn tv, zbardh për herë të parë sa qytete e fshatra do mbjellin drogë dhe sa hektarë.

Më datë 6 Mars 2025 qeveria vendosi “Miratimin e zonave kadastrale në të cilat lejohet kultivimi i bimës së kanabis-it për qëllime industriale, sipas shtojcave, që i bashkëlidhen këtij vendimi dhe janë pjesë përbërëse të tij. Ushtrimin e aktivitetit të kultivimit të bimës së kanabis-it për qëllime industriale, në përputhje me kufizimet e përcaktuara në vendimin nr.50, datë 22.1.2025, të Këshillit të Ministrave, “Për miratimin e standardeve për zonat dhe parcelat e tokës në të cilat do të lejohet kultivimi i bimës së kanabis-it për qëllime mjekësore dhe industriale”, thuhet në VKM e publikuar nga gazetari Rusta.

Kanabis legal nuk do të kultivohet në zonën e Lazaratit si dhe në zonën e Lumit të Vlorës.
Ndërsa do të jetë i lejuar në: Shkodrës/ Malësi e Madhe, Tropojë, Dibër / Kukës, Belsh / Cërrik, Këlcyrë/ Përmet, Delvinë/Finiq, Dropull / Gjirokastër, Dropull/Finiq, Fier/Mallakastër si dhe në Has.

Janë këto 10 zonat kadastrate të përzgjedhura me vendim qeveria pas propozimit të Ministres së Bujqësisë zonja Anila Denaj.

Në total do të mbillen me hashash 22.296 hektarë tokë.

Nga këto dy sipërfaqet më të mëdha do të jenë në Dropull/ Libohovë dhe në Tropojë përkatësisht me nga 3715 ha dhe 3685 ha.

Ndjekur më pas nga Dropull/Gjirokastër me 3220 ha, Belsh/ Cërrik me 2474 ha, Delvinë/ Finiq me 2454 ha, 1827 ha Shkodër/ Malësi e madhe, Këlcyrë/ Përmet me 1774 ha, Dibër/ Kukës me 1230 ha, Has me 973 ha.

Zona e konsideruar si hambari i tokës bujqësore në Shqipëri qarku i Fierit do të ketë numrin më të vogël të hektarëve me 666 ha të lejuar për kanabis, raporton Fakt Check. m.k

/DRONI.al/