Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtor ish-kryebashkiakun e Himarës, Jorgo Goro, për shpërdorim detyre, duke e dënuar me 2 vjet e 20 ditë burg.
Prokuroria e Posaçme (SPAK) kishte kërkuar një dënim prej 3 vitesh, por gjykata vendosi një masë më të ulët.
Në vendimin e saj, GJKKO urdhëroi edhe konfiskimin e dy pronave të përfshira në këtë çështje, me një sipërfaqe prej 10 mijë metrash katrorë në zonën e Dhërmiut, të cilat do të kalojnë në favor të shtetit.
Jorgo Goro, së bashku me dy ish-drejtorët e Bashkisë Himarë, Jerasimo Bashi dhe Vasillaq Strakosha, u akuzua nga SPAK për përfshirje në dy raste të tjetërsimit të pronave në Dhërmi.
Në rastin e parë, prokuroria pretendon se Goro dhe vartësit e tij kanë dorëzuar dokumente të falsifikuara për një pronë prej 5,500 metrash katrorë, duke mundësuar kalimin e saj nga pronë shtetërore në pronësi private.
Në rastin e dytë, ata dyshohet se kanë ndryshuar vendndodhjen e një prone bujqësore prej 5,000 metrash katrorë, duke e mbivendosur mbi një pasuri shtetërore dhe më pas e kanë shitur te investitorët. Pas kësaj, është dhënë një leje ndërtimi për një kompleks turistik. Toka do të shfrytëzohej nga ish deputeti socialist Artan Gaçe. a.b
