Foto ilustruese
Një makinë mori flakë në një karburant në Devoll ndërsa po furnizohej duke rrezikuar të shndërrohej në tragjedi për shumë persona.
Dy personat në makinë babë e bir kanë marrë djegie ndërsa njerëz të guximshëm, siç duket jo nga Korça, e lëvizën makinën në flakë larg depozitës për të shmangur një shpërthim me pasoja të rënda.
“Rreth orës 12:55, në aksin rrugor “Korçë-Devoll”, në fshatin Belorta, Korçë, në një karburant, ka rënë zjarr në automjetin tip “Benz”, me drejtues shtetasin D. O., 35 vjeç, banues në fshatin Rëmbec, Maliq, në momentin kur ky shtetas po e furnizonte automjetin, me karburant.
Në brendësi të automjetit ndodhej pasagjer babai i tij, shtetasi M. O., 72 vjeç, i cili së bashku me 35-vjeçarin, kanë pësuar djegie trupore dhe ndodhen për mjekim, në spital. Automjeti i tyre është larguar nga karburanti prej personave të tjerë, të cilët e kanë nxjerrë jashtë rrugës, me qëllim shmangien e rrezikut të mëtejshëm”, njoftoi policia e Korçës.
Grupi hetimor po punon për përcaktimin e shkaqeve të rënies së zjarrit. m.k
