Kryetari i bashkisë së Tiranës, Erion Veliaj ka refuzuar ngritjen e një komisioni të kontrollit nga këshilli bashkiak për financat e bashkisë ndërsa po ashtu ka refuzuar edhe një audit në lidhje me abuzimet e drejtorëve tashmë në pranga.
Nënkryetari i këshillit bashkiak Dorian Teliti tha sot se Veliaj refuzoi gjatë një mbledhje të zgjeruar të kryesisë së këshillit bashkiak të gjitha propozimet e grupit të opozitës.
“Ata i thanë JO kërkesës për mbledhje jashtë radhe / të jashtëzakonshme të Këshillit Bashkiak për të thirrur Kryebashkiakun dhe trajtuar, debatuar e nxjerre provat mbi aferën 5D. E qartë që ata kanë frikë të përballen me të vërtetat e hidhura.
Ata i thanë JO ngritjes së një komisioni të përkohshëm me karakter “quasi hetimor” për të investiguar së cilat hallka kanë ceduar e lejuar abuzimin me fondet e buxhetit të bashkisë. E qartë që ata nuk duan transparencën.
Ata i thanë JO kërkesës për kontraktimin e një auditi të huaj mbi të ardhurat dhe shpenzimet e bashkisë.
Ata i thanë përsëri JO, për të disatën herë, ngritjes së Komisionit të Përhershëm 4-vjeçar të Kontrollit Financiar, detyrim ky ligjor dhe i Rregullores së Brendshme të vetë Këshillit, konkretisht neni 36 siç jepet edhe në monitor, duke vazhduar të qënurit në shkelje të rregullores për të 10-in muaj radhazi nga dita e konstituimit të këtij Këshilli në qershor 2023. E qartë që ata nuk duan tja dine as për ligj e as për asgjë tjetër”, tha Teliti në një konferencë për shtyp. a.b
Teliti tha se kjo është një tjetër arsye që të premten në orën 11.00 të gjithë të protestojmë te bashkia e Tiranës.
“Partia Demokratike i bën thirrje çdo qytetari që ndihet i ofenduar, i keqtrajtuar, i nëpërkëmbur në dinjitet, i varfëruar në ekonominë e tij familjare, çdo sipërmarrësi që dita ditës rrezikon falimentin, cdo profesionisti të lirë të taksuar pandershmërisht, çdo fermeri të braktisur e çdokujt që ndihet i vjedhur, ti bashkohet protestës së thirrur nga Aleanca për Mbrojtjen e Teatrit, ditën e premte, ora 11.00 para Bashkisë Tiranë, për të kërkuar dorëheqjen e Veliaj, për të protestuar të gjithë bashkë për një Tiranë Europiane”, deklaroi Teliti.a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
