Pas një rezistence 5 mujore të opozitës në Parlament, mazhoranca është tërhequr nga bllokimi i saj ndërsa deputetët e Partisë Demokratike i janë kthyer normalitetit në Kuvend.
Sot zhvilluan punime 4 komisione me prezencën e deputetëve dhe jo online. Komisioni i Ligjeve ishte i pari që u mblodh dhe të pranishëm ishin edhe deputetët e opozitës.
Deputeti demokrat Dashnor Sula tha se marrëveshja buk asgjë më shumë se sa kthim në ligj i mazhorancës, kështu ajo është marrëveshje false.
“Kjo ishte loja, marrëveshja u bë në Tiranë, tymi plasi në Sazan. Ky kthim në normalitet duhet të kishte ndodhur që në Tetor 2023. Ngjarjet dihet se si kanë shkuar. Marrëveshja për mua është një “fake” i pastër. Nuk mund të jem këtu hipokrit që është një normalitet. Është normalitet i rremë”, tha ai.
Ndërsa PS zhvilloi një mbledhje të grupit parlamentar ku i pranishëm ka qenë edhe kryeministri Edi Rama.
”Në fjalën drejtuar deputetëve kryeministri Rama kërkoi që të vijohet puna me Organizatat Socialiste në terren dhe të intensifikohet komunikimi me anëtarët e këtyre organizatave dhe qytetarët në çdo zonë”, njoftoi PS.
Kreu i grupit socialist Bledi Çuçi tha se s’ka asnjë marrëveshje e as do të krijohet ndonjë nënkomision ose strukturë e posaçme.
“S’ka asnjë nënkomision apo strukturë tjetër, thjesht në Komisionin e Ligjeve do të krijohet një mekanizëm dialogu për ligjet me 3/5 dhe ato që kanë lidhje me çështjet e integrimit europian. Opozita u rikthye andej nga kishte ikur. Ramë dakord të ndryshojmë objektet e komisioneve hetimore në Konferencën e Kryetarëve”, u shpreh Çuçi.
Në vijim të mbledhjes diskutimet u ndalën te projektligjet që janë në rendin e ditës për seancën e së enjtes, ku mes të tjerash pritet të kalojë edhe Akti Normativ për ndryshimet në Ligjin e Buxhetit, projektligji “Për Sigurinë Kibernetike”, “Projektligji për disa ndryshime në Ligjin për Gardën e Republikës” etj. Diskutime ka pasur edhe për Amnistinë Penale por ky ligj që kërlon 84 vota pritet të diskutohet edhe në mekanizmin e grupit të punës që do të ngrihet tek Komisioni i Ligjeve.
Deri tani është mësuar se do jenë anëtarë Oerd Bylykbashi nga PD-ja dhe Klotilda Bushka nga PS-ja, ndërsa pritet edhe për 2 të tjerë. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
