Dalin emra të tjerë deputetësh në dosjen Ahmetaj, ja kush janë

Deputeti i Partisë Demokratike Gazment Bardhi ka folur për mediat në lidhje me çështjen e Arben Ahmetajt pas mbledhjes së Këshillit të Mandateve, duke zbuluar se në dosje përmenden një sërë emrash nga radhët e socialistëve.

Bardhi u shpreh se nga shqyrtimi që ka bërë ai vetë rezulton se në dosje përmenden po ashtu edhe Ermonela Felaj, Fadil Nasufi dhe Bajftjar Zeqo.

“Nga shqyrtimi që kam bërë unë, rezulton se në dosje përmenden po ashtu edhe Ermonela Felaj, Fadil Nasufi, Bajftjar Zeqo.

Mëshirë për ata që abuzojnë me detyrën dhe bëjnë korrupsion e shpërdorojnë besimin e shqiptarëve dhe bëhen nga të pastrehë në persona me 2-3 vila nuk do ketë kurrë. Nuk e deklaruan vendndodhjen e Ahmetajt.

Ata pohuan se kanë komunikuar me të, dhe pohuan se Ahmetaj do kthehet. Kam një lutje për personin nën hetim, të bëhet bashkëpunëtor i drejtësisë. Le të shërbejë për qytetarët që i dhanë besimin që të ishte në qeverisje”, u shpreh ai.

Ndërsa deputeti Ervin Salianji tha se në dosje të SPAK është edhe emri i Damian Gjiknurit ndërsa shtoi se të përfshirë janë edhe shumë zyrtarë e funksionarë të lartë të mazhorancës dhe qeverisë.

“Personi në hetim nuk është në Shqipëri. Ky rast është një rast që ka shpërfaqur në syrin tonë dhe të publikut një rast të madh korrupsioni ku thuajse gjithë qeveria është përfshirë dhe dhjetëra persona deputetë aktualë të PS, kryetarë bashkie e funksionarë të lartë janë përfshirë po njësoj në korrupsion ,Për këtë arsye Rama dhe kjo mazhorancë duhet të japin dorëheqjen për të shmangur këtë krizë që është krijuar. Është përmendur edhe emri që thoni ju, ashtu si dhjetëra të tjerë që janë edhe kryebashkiakë dhe funksionarë të lartë”, tha Saliani pas mbledhjes së Këshillit të Mandateve.

Gjiknuri ka përfituar pagesa për një udhëtim jashtë shtetit nga inceneratorët. Ai udhëtonte bashkë me Ahmetajn. a.b

/DRONI.al/