Një auditim i Kontrollit të lartë të Shtetit për mjedisin dhe gjelbërimin në Tiranë ka provuar se nuk ekziston një Pyll Orbital në Tiranë.
Kështu, pema e 1 miliontë është vetëm në kokën e kryebashkiakut dhe imagjinatën e atyre që paguhen për të besuar ricikluar broçkulla orbitale, tha anëtari i këshillit bashkiak të Tiranës, Jonathan Pano.
“Projekti i Pyllit Orbital për shkak të pamundësive financiare si dhe problematikave që lidhen me mungesën e hapësirave të nevojshme për mbjellje dhe çështjeve të pronësisë, rezulton me një nivel të ulët realizimi, megjithëse ka kaluar një pjesë e konsiderueshme e periudhës së zbatimit të këtij objektivi,” thuhet në raportin e auditit për vitin 2022 të prezantuar në Kuvend dje, ku u tha që pyll orbital nuk ka.
“Mjedisi po degradon me ritme të shpejta, fakt ky që reflektohet në probleme të tilla si pasiguria e tokës, përkeqësimi i cilësisë së ujit, ndotja e ajrit, zhurmat dhe problemet e depozitimit të mbeturinave, etj.” thuhet në raportin e KLSH.
KLSH konstaton gjithashtu se “zhvillimi i pakontrolluar urban ka shkaktuar ulje të raportit për frymë të hapësirave të gjelbra’.
KLSH i rekomandon bashkisë që të marrë masa për shtimin e hapësirave të gjelbra të reja në territorin që administron, pasi konstaton se në përgjithësi objektivat e saj në këtë drejtim “rezultojnë të realizuara jo në nivelet e pritshme”.
Nuk mund të ishte ndryshe sepse raportet e NUMBEO-s e listojnë Tiranën si një ndër qytet më të ndotura në botë.
”Edhe një Institut shkencor Italian që realizoi për emisionin Piranjat një matje të ndotjes së ajrit gjeti se gazet e dëmshme në ajrin e kryeqytetit janë 10 herë më të larta se norma.
Ndotja është alarmante për ne që jetojmë dhe punojmë në këtë qytet dhe nuk njeh dallime politike”, deklaroi Pano. a.b
