Ambasadori i Kinës në Tiranë, Zhou Ding, vizitoi dje Qendrën Kombëtare të Librit dhe Leximit. Ai vlerësoi punën e Qendrës Kombëtare të Librit dhe Leximit për nxitjen e leximit në vend.
Bashkëpunimi mes Kinës dhe Shqipërisë në fushën e librit, përkthimi i autorëve shqiptarë në gjuhën kineze, zhvillimi i aktiviteteve të përbashkëta me në fokus librin, pjesëmarrja në festivale dhe konferenca të rëndësishme letrare, sfida e leximit për brezin e ri, ishin pjesë e bisedës.
Prej disa vitesh, një program i rëndësishëm në fushën e librit ka filluar midis qeverive të dy vendeve, me një mbështetje të rëndësishme financiare nga ana e qeverisë së Kinës për botimin e rreth 25 librave të përkthyer nga letërsia kineze në shqip dhe anasjellas, në bashkëpunim me Shoqatën e Botuesve Shqiptarë.
Ambasadori Ding u shpreh se libri është mjeti që ka bashkuar gjithnjë dy popujt tanë, duke shprehur mbështetjen për programe që kanë në fokus autorët e rinj shqiptarë.
Kina, pohoi diplomati – do ndihmojë në botimin e autorëve shqiptarë në gjuhën kineze përmes mbështetjes së programeve të përbashkëta.
“Dje vizitova Qendrën Kombëtare të Librit dhe Leximit, duke shkëmbyer mendime për bashkëpunimin në fushën e librit me Drejtoreshën e Qendrës Znj. Alda Bardhyli dhe autorin Z. Roland Tasho. Unë i vlerësoj përpjekjet e Qendrës për të ngritur vëmendjen e njerëzve ndaj librit dhe leximit dhe për të promovuar gjuhën dhe kulturën shqiptare. Si Kina ashtu edhe Shqipëria kanë një histori të gjatë dhe një thesar të pasur e të shkëlqyer të letërsisë.
Vitet e fundit janë lulëzuar shkëmbimet kulturore mes dy vendeve. Marrëveshja e bashkëpunimit të projektit të përkthimit të ndërsjellë dhe botimit të librit klasik Kinë-Shipëri, ka hapur bashkëpunimin më të madh botues mes dy vendeve deri më tani. Ambasada Kineze në Shqipëri është e gatshme të forcojë bashkëpunimin me Qendrën për të eksploruar forma më të pasur bashkëpunimi, duke promovuar bashkërisht shkëmbimet kulturore midis dy vendeve, si dhe lidhjet mes njerëzve”, u shpreh Zhou Ding.
Ambasadori Zhou Ding vizitoi dhe ekspozitën “Një karrige për shkrimtarët”, me autor Roland Tashon, e cila prej dy javësh vijon të jetë e hapur në hapësirat e Qendrës Kombëtare të Librit dhe Leximit.a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
