Gjyqi për detin në Gjykatën e Hagës, befasuese rastet kur Greqia nuk njeh vendimin e saj. E ka shqyrtuar qeveria Rama këtë dokument

Një deklaratë e Greqisë në vitin 2015 në lidhje me kushtëzimin ndaj disa vendimeve të gjykatës ndërkombëtare të drejtësisë në Hagë vë në dyshim rezultatin e gjyqit mes Shqipërisë dhe Greqisë për kufirin detar dhe faktin nëse Greqia do të pranojë atë vendim.

Në një shkrim nga gazetari Arsen Rusta në weblajm.com thuhet se Greqia ka deklaruar në 2015 se janë disa raste kur Greqia nuk do të njohë vendimet e kësaj gjykate.

Një ndër rastet ku refuzohen vendimet e gjykatës është ai i kufijve detarë.

Greqia nuk pranon “çdo mosmarrëveshje në lidhje me kufijtë shtetërorë ose sovranitetin mbi territorin e Republikës së Greqisë, duke përfshirë çdo mosmarrëveshje mbi gjerësinë dhe kufijtë e detit të saj territorial dhe hapësirës ajrore të saj”, thuhet ndër të tjera në përjashtimet e respektimit të gjykatës nga Greqia.

Deklarata nga Greqia që njeh juridiksionin e Gjykatës si të detyrueshëm si dhe rastet përjashtuese:

14 janar 2015

Qeveria e Republikës së Greqisë bëri një deklaratë sipas paragrafit 2 të nenit 36 të Statutit të Gjykatës Ndërkombëtare të Drejtësisë.

Qeveria e Republikës së Greqisë, duke marrë parasysh deklaratën në fjalë, njofton menjëherë tërheqjen e kësaj Deklarate dhe e zëvendëson me deklaratën e mëposhtme:

Kam nderin të deklaroj, në emër të Qeverisë së Republikës së Greqisë, se njoh si të detyrueshëm ipso facto dhe pa marrëveshje të veçantë, në lidhje me çdo shtet tjetër që pranon të njëjtin detyrim, që është me kusht reciprociteti, juridiksionin e Gjykatës Ndërkombëtare të Drejtësisë në lidhje me të gjitha mosmarrëveshjet ligjore të përmendura në nenin 36, paragrafi 2, të Statutit të Gjykatës, me përjashtim të:

a) çdo mosmarrëveshje në lidhje me veprimtaritë ushtarake dhe masat e marra nga Republika e Greqisë për mbrojtjen e sovranitetit dhe integritetit të saj territorial, për qëllime të mbrojtjes kombëtare, si dhe për mbrojtjen e sigurisë së saj kombëtare;

b) çdo mosmarrëveshje në lidhje me kufijtë shtetërorë ose sovranitetin mbi territorin e Republikës së Greqisë, duke përfshirë çdo mosmarrëveshje mbi gjerësinë dhe kufijtë e detit të saj territorial dhe hapësirës ajrore të saj;

 (Pika e cila lidhet ekskluzivisht me raportet e gjyqin Shqipëri-Greqi)

c) çdo mosmarrëveshje në lidhje me të cilën ndonjë palë tjetër në mosmarrëveshje ka pranuar juridiksionin e detyrueshëm të Gjykatës vetëm në lidhje me ose për qëllimin e asaj mosmarrëveshjeje; ose kur pranimi i juridiksionit të detyrueshëm të Gjykatës në emër të ndonjë pale tjetër në mosmarrëveshje është depozituar ose ratifikuar më pak se dymbëdhjetë muaj përpara depozitimit të kërkesës që e çon mosmarrëveshjen përpara Gjykatës.

Megjithatë, Qeveria e Republikës së Greqisë mund të paraqesë përpara Gjykatës çdo mosmarrëveshje, e cila përjashtohet me këtë, nëpërmjet negocimit të një marrëveshjeje të veçantë (kompromis).

Qeveria e Republikës së Greqisë rezervon më tej të drejtën në çdo kohë, me anë të një njoftimi drejtuar Sekretarit të Përgjithshëm të Kombeve të Bashkuara, dhe që nga momenti i këtij njoftimi, të shtojë, ndryshojë ose tërheqë këtë Deklaratë.

Athinë, 13 janar 2015. (nënshkruar) Evangelos Venizelos

/DRONI.al/