Dalin fotot e djalit të El Chapos në burg, trazira në Sinaloa, 10 policë dhe 19 trafikantë të vrarë

Janë publikuar pamjet e para direkt pas arrestimit të të shumëkërkuarit e kartelit “Sinaloa”, 32-vjeçari Ovidio Guzman, djali i Joaquin “El Chapo” Guzman, ky i fundit i ekstraduar në Shtetet e Bashkuara të Amerikës në vitin 2017.

Arrestimi i djalit të “El Chapos” u realizua nga forcat e sigurisë meksikane të mërkurën mbrëma, gjë që shkaktoi një valë të madhe dhune në të gjithë shtetin e Sinaloas, duke përfshirë edhe një aeroport ku shokët e Ovidios goditën me plumba tre avionë, duke shkaktuar panik mes pasagjerëve dhe stafit.

Nëntëmbëdhjetë anëtarë të dyshuar të kartelit dhe dhjetë anëtarë të forcave të sigurisë u vranë në përleshjet, ndërsa 21 persona të tjerë u arrestuan gjatë operacioneve të forcave speciale meksikane.

Ovidio, i quajtur me nofkën “El Ratón” ose “Miu”, aktualisht po mbahet në një burg federal të sigurisë maksimale në Mexico City. Fotot e shpërndara në internet nga gazetarët meksikanë treguan se trashëgimtari i kartelit dukej i tronditur në paraburgim.

I veshur me një jelek portokalli me ngjyrë burgu, ai shikon me sy të trembur, ndërsa po merret në pyetje nga oficerët. Një foto e dytë e tregon atë duke u futur në një helikopter.

Të paktën 28 persona u raportuan të plagosur në përleshjet me armë, duke përfshirë tetë civilë.

BETEJAT NË RRUGË

Njerëzit u nxitën të qëndronin brenda në mes të shpërthimit të dhunës, pasi persona të armatosur dogjën automjete dhe plaçkitën dyqane dhe shtëpi.

Raportet pretendojnë gjithashtu se grupet e armatosura sulmuan spitalet dhe qendrat shëndetësore, duke “rrëmbyer” mjekë dhe infermierë dhe duke i detyruar ata të trajtojnë luftëtarët e kartelit të plagosur në luftimet me forcat e sigurisë.

Dy ambulanca raportohet se janë vjedhur me ndihmës mjekësorë brenda dhe mjekët janë marrë peng nga disa spitale në qytetin Sinaloa të Navolato.

Shtetet e Bashkuara kishin ofruar një shpërblim prej 5 milionë dollarësh për informacionin që çon në arrestimin ose dënimin e Ovidios. Nuk është e qartë nëse Ovidio do të ekstradohet në Shtetet e Bashkuara si babai i tij, i cili po vuan dënimin e përjetshëm në Supermax të Kolorados, burgu më i sigurt federal i SHBA.

Ovidio është akuzuar gjithashtu nga Departamenti i Shtetit i SHBA-së – së bashku me vëllain e tij Joaquin – për mbikëqyrjen e 11 laboratorëve, që prodhonin deri në 2200 kg të drogës në muaj.

Autoritetet besojnë se ai fshihet gjithashtu pas vrasjeve të informatorëve, një trafikanti rival droge dhe një këngëtari popullor meksikan që refuzoi të këndonte në dasmën e tij. A2news