Historiani Erald Kapri: Xhaferr Deva nuk ka lidhje me holokaustin, debati për të dobësuar qeverinë Kurti

Kosova është përfshirë në polemika për figurën e Xhafer Devës pas një deklarate të ambasadorit gjerman që e lidh atë me krimet që kanë kryer nazistët, gjatë Luftës së Dytë Botërore, transmeton ora news.

Gjithçka nisi pas lajmit për restaurimin e shtëpisë së tij në Mitrovicë, e dëmtuar dhe e djegur disa herë.

Historiani dhe studiuesi Erald Kapri në një intervistë për Rtv Ora me gazetaren Beti Njuma thotë se diplomati u nxitua në komentet e tij.

Sipas Kaprit, komenti i Ambasadorit është i drejtë për shqetësimin që ngre por nuk është informuar sa duhet për realitetin shqiptar.

Kapri: Xhafer Deva është vërtet një figurë shumë polemiste por fatkeqësisht e pastudiuar sa duhet. Ne në Shqipëri dhe Kosovë çështjen kolaboracionizmit dhe bashkëpunimit nuk e kemi studiuar sa duhet. Në Kosovë ka shumë tema të tjera që nevojitet të diskutohen.

Nuk flitet për vrasjen e Shaban Polluzhës, zhdukjen e Gani Kryeziut që kanë qenë anti-fashistë me mjaft vlerë dhe u zhdukën nga komunistët, por merren me Xhafer Devën, i cili në aktivitetin e vet nuk ka fshehur asgjë. Ai ishte vërtet bashkëpunëtor i gjermanëve, nuk ishte nazist.

Është e gabuar përfshirja e aktivitetit të tij me holokaustin, kjo është më e gabuara te deklarata e Ambasadorit gjerman. Shqipëria është ndër vendet e pakëta në Europë, bashkë me Danimarkën dhe Bullgarinë, që shpëtuan hebrenjtë. Ndryshe nga këto dy vende, Shqipëria shpëtoi dhe 10-fishin e hebrenjve që jetonin në Shqipëri dhe Xhafer Deva ka një kontribut këtu.

Kur flasim për bashkëpunimin me nazistët, bashkëpunimi shqiptar meriton të ketë një vëmendje ndryshe. Në historinë e Shqipërisë nuk ka figurë politike që nuk ka bashkëpunuar me dikë, ka pasur një mbështetje nga një fuqi e huaj apo shtet i huaj. Në rastin e Luftës së Dytë Botërore çështja është tepër komplekse.

Shqipëria dhe shqiptarët nuk kanë pasur ndonjë problem me shkëputjen nga kolaboracionizmi, thotë Kapri.

Ndaj dhe sjellja e figurës së Xhafer Devës në mënyrë kaq të mbrapshtë, sipas tij, ka ka një prapavijë tjetër, kryesisht politike, që nuk ka të bëjë shumë me debatin historik. Oea news

/DRONI.al/