EKREM SPAHIU/ Një jetë për shqiptarët, 10 vjet pa Mbretin Leka I

Nga Ekrem Spahiu

Mbreti Leka, do të mbahet mend dhe do të përkujtohetpërjetë për vlerat prestigjioze kombëtare, të cilat i mishëroi në konsekuencën politike mbretërore ndaj të ardhmes së Shqipërisë dhe të kombit shqiptar. Ai nuk abdikoi kurrë nga froni mbretëror, duke ruajtur të pacënuar besimin për këtë të ardhme.

​Për Mbretin Leka, çështja kombëtare përbënte shqetësimin dhe angazhimin kryesor të gjithë jetës së Tij, për të cilën sakrifikoi dhe mbajti çdo kosto për veten dhe familjen mbretërore.

​Besimplotë dhe i përkushtuar në konsekuencën politike mbretërore, Mbreti Leka I, jo vetëm që ishte kundër regjimit dhe diktaturës komuniste, por edhe e luftoi atë me të gjitha mënyrat.

​Mbreti Leka, është burrështetasi më i votuar nominalisht në historinë politike të Shqipërisë. Këtë e tregon rezultati i Referendumit të 29 qershorit 1997, i shpallur zyrtarisht nga Komisioni Qëndror i Zgjedhjeve, në të cilin votuan pro Monarkisë 450,478 zgjedhës, baraz me 33.26 % të votuesve. Ndërkohë, sipas të dhënave nga komisionerët e monarkisë në qendërat e votimi, rezultati real i arritur në atë Referendum, në rang kombëtar, ishte 54% pro Monarkisë.

Kjo shkallë e lartë popullariteti u manifestua edhe gjatë pritjes që iu bë Mbretit Leka në Rinas, e cila do të mbetet në librat e historisë si pritja më madhështore dhe më entusiaste që i është bërë ndonjëherë personaliteteve të kombit shqiptar.

Për ndarjen nga jeta të Mbretit Leka, më 3 dhjetor, Shteti Shqiptar organizoi një ceremoni mortore zyrtare dinjitozehomazhesh e lamtumire në mjediset e Kuvendit të Shqipërisë, e cila kishte një domethënie të madhe për institucionin e Mbretërisë. Dita kur u zhvillua ceremonia u shpall ditë zie kombëtare, duke ulur flamurin në gjysëm shtize në të gjithë institucionet. Drejtuesit më të lartë shtetërorë, nga Shqipëria e Kosova, kryetarët e të gjitha partive politike, krerët e të gjitha besimeve fetare, dhjetra mijëra qytetarë e bashkëkombas nga të gjitha trevat shqiptare, i dhanë lamtumirën e fundit Mbretit të tyre.

Qoftë i përjetshëm kujtimi për Mbretin Leka I.

/DRONI.al/