Mbledhja e përbashkët mes dy qeverive, shqiptare dhe asaj kosovare do të zhvillohet në Elbasan më 26 nëntor.
Këtë e bëri me dije vetë kryeministri Edi Rama në një postim në Facebook, ku shkruan:
“Nesër mbledhja e përbashkët e dy qeverive në Elbasan“.
Disa nga marrëveshjet që do diskutoben janë ato për sigurime shoqërore, ku është kërkuar autorizimi për nënshkrim nga Presidentja e Kosovës, Vjosa Osmani, marrëveshja për lejet e qëndrimit në afat 5-vjeçar, përmes një aplikimi të thjeshtë dhe ajo për lehtësimin e procedurës së njohjes së diplomave.
Ministrja e Arsimit, Shkencës, Teknologjisë dhe Inovacionit, Arbërie Nagavci në një prononcim për Telegrafin ka bërë të ditur se marrëveshja në fushën e arsimit do të jetë për lehtësim të procedurës së njohjes së diplomave.
“Marrëveshja që do te nënshkruhet në fushën e arsimit është: Marrëveshje dypalëshe për lehtësimin e procedurës së njohjes se diplomave nga IAL-te (të konfirmimit të të diplomuarve nga Qendrat Kombëtare respektive të Njohjes së Diplomave). Në fushën e njohjes dhe njësimit reciprok të diplomave, certifikatave dhe gradave shkencore, të lëshuara nga institucionet e arsimit të lartë dhe institucioneve të tjera të autorizuara”, theksoi Nagavci.
Po ashtu mësohet se do të nënshkruhet edhe një memorandum mirëkuptimi për studimin e fizibilitetit për ndërtimin apo rehabilitimin e segmentit hekurudhor Durrës-Prishtinë.
Pritet të ketë edhe marrëveshje në fushën e sigurisë por të cilat deri më tani nuk janë bërë të ditura.
Të gjithë qytetarët e Kosovës do të mund të marrin lejen e qëndrimit në afat 5-vjeçar së bashku me lejen e punës në Shqipëri, vetëm me një aplikim të thjeshtë.
Kështu ka bërë të ditur ministri i Brendshëm i Shqipërisë, Blendi Çuçi duke shtuar se kjo do të nënshkruhet të premten në takimin e përbashkët të dy qeverive.
Ndërkohë po në këtë mbledhje do të emërohet edhe kordinatori mes dy qeverive, Gentian Sala. a.b
