PD ia thotë në sy ministrit gjerman: Zgjedhjet ishin masakër elektorale

Kryetari i PD, Lulzim Basha i tha sot ministrit gjerman se zgjedhjet e 25 prillit ishin një masakër elektorale. Në një deklaratë për mediat pas takimit me ministrin gjerman të Shtetit Michael Roth, Basha thab se e njoha atë me zhvillimet e fundit qe lidhen me masakren zgjedhore te 25 Prillit. Shqiperia humbi nje mundesi te arte me zgjedhjet e 25 Prillit jo vetem per demokracine dhe shqiptaret por e humbi dhe per procesin e integrimit, theksoi Basha.

“Pata kënaqësinë të pres ministrin e Shtetit Michael Roth  të cilin e informova mbi zhvillimet dramatike dhe masakrën zgjedhore të 25 prillit. Shqipëria humbi një mundësi të artë për shqiptarët, për demokracinë, por edhe për të ecur përpara me procesin e integrimit europian të vendit. Për mua mua, për Partinë Demokratike, për opozitën nuk ka mundësin tjetër dhe nuk ka mundësi më të mirë për të  ndryshuar vendin sesa procesi i integrimit europian. Ky është një proces i bazuar tek arritjet, tek meritat dhe për fat të keq në këto zhvillime siç e kemi parë edhe nga konkluzionet e Këshillit Europian apo nga Rezoluta e Bundestagut Shqipëria ka mbetur në vendnumëro për 8 vite për shkak të mosarritjeve të kushteve të vendosura  të cilat janë rënduar  edhe më shumë me zhvillimet e 25 prillit. Ne kemi bërë  gjithçka në dorën tonë, opozita ka bërë gjithçka duke filluar me konsensusin për Reformën në Drejtësi dhe konsensusin për Reformën Zgjedhore të 5 qershorit. Për fat të keq qeveria i shkeli me këmbë të dyja këto. Ajo që i kam kërkuar ministrit Roth njësoj si të gjithë miqve ndërkombëtarë është të flasin dhe të denoncojnë masakrën zgjedhore të 25 prillit para se të jetë  tepër vonë për demokracinë dhe për Shqipërinë për të mos lënë që e njëjta situatë të ndodhë që Shqipëria të vazhdojë të jetë e mbushur me kriminelë në parlament, me drogë dhe zhytur në indekset më të ulëta në luftën kundër korrupsionit dhe krimit të organizuar. Gjermania ka qenë dhe është mbështetëse e madhe e Shqipërisë  në çdo front e në veçanti në rrugën e integrimit europian dhe unë për këtë dua t’i shpreh mirënjohjen më të thellë ministrit Roth, qeverisë federale, kancelares Merkel, Bundestagut dhe popullit mik gjerman”, deklaroi Basha para gazetarëve pas takimit me ministrin gjerman.

Edhe Ministri gjerman i Shtetit për Evropën në Ministrinë e Jashtme federale, Michael Roth, foli për mediat pas takimit të zhvilluar me kryetarin e PD Lulzim Basha.

Roth tha se i beson raportit të ODIHR sa u takon zgjedhjeve të zhvilluara në Shqipëri, ndërsa theksoi se problematikat duhet të adresohen përmes institucioneve. “Parlamenti është vend i duhur për t‘i çuar përpara debatet mes qeverisë the opozitës”, u shpreh ai.

“Dëshiroj t’ju falënderoj për mikëpritjen tuaj z.Basha që pata mundësinë ta shijoja në ambientet e PD. Natyrisht që të gjitha kritikat që do adresohen ndaj problematikave, do të duhet të qartësoheshin dhe duhet të bëhen përmes institucioneve. I besojmë ODIHR-t që është një institucion i pavarur, që na ka mbështetur në proceset zgjedhore, nëse kanë qenë të ndershme.

Jam dakord me z. Basha që e ardhmja e Shqipërisë gjendet në BE dhe askund tjetër. Nëse kjo rrugë do të jetë e suksesshme, kjo nuk varet vetëm nga qeveria por edhe Parlamenti dhe opozita. Uroj që pas debateve të së shkuarës të gjendet një ton konstruktiv në marrëdhëniet e qeverisë me opozitën. Unë jam në politik aktiv që prej 23 vitesh, prej 8 vitesh në qeveri. Kam qenë aktiv si në qeveri ashtu edhe opozitë, të dy këto elemente janë të rëndësishme. Në një sistem demokratik jemi konkurrent, jo armiq, dhe Parlamenti është vendi i duhur për t’i çuar përpara debatet. Shkëmbimi me z.Basha ka qenë dhe është tejet i rëndësishëm.

Komisioni Europian në muajit e shkuar ka vlerësuar në mënyrë të kujdesshme dhe kritike nëse janë përmbushur kushtet nga Shqipëria për Konferencën e Parë ndërqeveritare. Komisioni ka mbërritur në një gjykim pozitiv, që i është bashkuar edhe Qeveria Federale, dhe shpresojmë që në 22 qershor Këshilli i BE të mbërrijë në çeljen e negociatave të anëtarësimit, sikurse në vendimin për Konferencën Ndërqeveritare. Ju të gjithë e dini që ky është hap shumë i rëndësishëm në rrugëtimin europian, do të jetë rrugë e gjatë, çelja e negociatave nuk do të thotë që të gjitha kushtet janë përmbushur, por Shqipëria ka një perspektivë të sigurt në BE”, u shpreh Roth. e.k

/DRONI.al/