“Ja pse Rama nuk e ka dëgjuar planin tonë”, Basha: Nuk është kinematografi me regji qëndrore, por rrugëdalje nga kriza

Kryetari i PD, Lulzim Basha paralajmëron se situata në vend po përkeqësohet. Në një dalje për mediat, kryedemokrati Basha tha se qeveria nuk ka marrë asnjë masë, madje nuk e dëgjon as planin e PD.

Basha u shpreh se Rama nuk e ka dëgjuar planin e PD, sepse nuk dëgjon shqiptarët.

“Javët kalojnë dhe kriza bëhet më e thellë. Ekonomia po zhytet ditë për ditë, numri i të papunëve po shtohet me qindra në ditë.

Shëndetësia është në kufijtë e kolapsit. Siguria e fëmijëve dhe e mësuesve në shkolla është lënë në mëshirë të fatit. Qeveria nuk ka marrë asnjë masë.

Kjo është gjendja sot, përkeqësim i thellë në të gjitha aspektet e jetës, të ekonomisë dhe shëndetit të shqiptareve.

Ndërkohë pyetjes tuaj, nëse ka ndërmend ta zbatojë planin me 5 pika që ne kemi shpalosur, Edi Rama i është përgjigjur se nuk ka dëgjuar për këtë plan

Unë e besoj, që ai nuk e ka dëgjuar këtë plan, sepse nuk ka ditë, por ka javë, muaj dhe vite që Rama nuk dëgjon. Nuk dëgjon njerëzit, nuk dëgjon biznesin që tani po i dorëzohet falimentimit. Nuk dëgjon mjekët, që kërkojnë mbështetjen minimale. Nuk dëgjon mësuesit, të cilët ditë për ditë marrim mesazhe nga ta për gjendjen katastrofike të higjienës”,-shprehet Basha.

Plani i Rimëkëmbjes: 5 hapa kundër krizës sipas Bashes dhe PD:

1. Mbështetje dhe përgatitje e sistemit shëndetësor: Përgatitja për një shpërthim tjetër të infeksionit të COVID-19, duke:
a) Rritur numrin e testimeve për COVID në 2500 testime në ditë.
b) Rimbursim i plotë për marrjen e mjekimit ambulator kundër COVID.
c) Sigurimin e paisjeve mbrojtëse për të gjithë personelin shëndetësor dhe rritjen e kapaciteteve spitalore.
d) Bonus 1000 Euro për çdo mjek dhe 500 euro për çdo infermier për 6 muajt e ardhshëm.

2. Fëmijët tanë të arsimohen të sigurtë: Të garantojmë që fëmijët dhe mësuesit në shkollë të jenë të sigurtë, duke:
a) Përmirësuar kushtet sanitare në shkolla duke përfshirë furnizimin me ujë, paisjen me maska mbrojtëse dhe dezinfektimin e rregullt të ambienteve mësimore.
b) Kryer testimin periodik për mësuesit dhe stafin ndihmës.
c) Investuar në teknologji për rastet kur mund të aplikohet mësimi në distancë, përfshirë ndihmën për familjet me të ardhura të ulta për të blerë tableta për fëmijët e tyre, në mënyrë që edhe ata të përfitojnë nga mësimi në distancë.

3. Asnjë shqiptar të mos lihet pas dore:
a) Të mbështesim ata që kanë humbur vendin e punës. Çdo individ që ka humbur vendin e punës nga pandemia gjatë këtij viti, të përfitojë një çek mujor prej 16 mijë lekë të reja në muaj, përvec pagesës ligjore për papunësinë, për një periudhë prej 6 muajsh.
b) Krijimi i një Fondi të Punësimit për të mbështetur bizneset për të rimarrë në punë të larguarit gjatë pandemisë, duke i alokuar cdo punëdhënësi që rimerr në punë një individ që ka humbur vendin e punës prej pandemisë, një shumë mujore prej 20 mijë lekë të reja në muaj për një periudhe prej 6 muaj.
c) Dyfishimi i ndihmës ekonomike për çdo familje që trajtohet me ndihmë ekonomike.
d) Çdo pensionist të përfitojë një çek mujor prej 2 mijë lekë të reja në muaj për përballimin e kostove shtesë të pandemisë, për 6 muaj.
4. Ndihmë për biznesin e vogël: Mbështetje e drejtpërdrejtë për të gjitha bizneset e vogla të prekura nga pandemia. Çek prej 1000 euro për çdo biznes të vogël aktiv.

5. Mbështetje për biznesin prodhues dhe punëdhënësit e mëdhenj:
a) Për 6 muajt e ardhshëm, subvencionim i 50% të qirasë për ambjentet e punës ose heqje e taksës së pronës për bizneset pronare të ambjenteve të punës.
b) Shtrirja në kohë dhe rikonceptimi i kritereve të përfitimit nga të dy skemat e garancisë sovrane, për ta bërë më të aksesueshme dhe të përballueshme kredimarrjen nga biznesi. Përcaktimi i një tavani prej 2% të normës së interesit për biznesin, duke subvencionuar çdo përqindje mbi këtë vlerë në kredimarrjen për investime dhe shpenzime operative.

/DRONI.al/

/DRONI.al/