Zoe Kleinman, BBC
A ju mbron marrja e vitaminës D kundër virusit vdekjeprurës?
Shkencëtarët në Francë kanë në plan që të studiojnë nëse nikotina mund të bllokojë infektimin e njerëzve me Covid-19.
Ata kanë në plan të përdorin strishat e nikotinës në një testim klinik, duke iu nënshtruar miratimit nga autoritetet shëndetësore.
Në punimin e tyre, ata nënvizojnë se pirja e duhanit në vetvete ka pasoja të rënda patologjike dhe mbetet një rrezik serioz për shëndetin.
Një studim i mëparshëm i pacientëve me Covid-19 në një spital të madh francez vuri në dukje se vetëm 4.4 përqind e 343 pacientëve ishin duhanpirës të rregullt.
Sipas një sondazhi të realizuar në vitin 2018, rreth 25 përqind e popullsisë janë duhanpirës.
Megjithatë, ka të dhëna se duhanpirësit mund të vuajnë simptoma më të rënda. Një studim i vogël me 78 pacientë në Kinë zbuloi se 27 përqind e grupit, të cilët u përkeqësuan pas 14 ditësh, kishin një histori të duhanpirjes, krahasuar me 3 përqind të atyre që u përmirësuan dhe u stabilizuan në të njëjtën pikë të sëmundjes së tyre.
Organizata Botërore e Shëndetësisë tha se në këndvështrimin e saj, pirja e duhanit mund të kontribuojë në simptoma më të rënda të sëmundjes, sepse kjo sjell një funksionim më të dobët të mushkërive.
“Raportimet për një studim në Francë, ku do të shihet nëse nikotina ndihmon në parandalimin ose zvogëlimin e simptomave të Covid-19, nuk duhet të dekurajojnë përpjekjet e duhanpirësve për ta lënë atë, por duhet t’i inkurajojnë që të përdorin nikotinën që t’i ndihmojë që ta lënë duhanin dhe të mos e fillojnë më”, tha Deborah Arnott, shefe ekzekutive e shoqatës Aksioni për Duhanin dhe Shëndetin.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
