Shehu: Dështon Check-up, rritet mosha për të mbuluar vjedhjen

“Check-up në shendetësi, qeveria kërkon të “mbuloje diellin me shoshe”, kështu është shprehur kreu i Departamentit të Shëndetësisë në PD, Tritan Shehu

Sipas PD qeveria vendos pa asnjë argu​ment teknik e shkencor që mosha e atyre që përfitojnë nga i ashtuquajturi Check- Up të zgjerohet deri më 70 vjec. “Kjo behet kur mbas dy vitesh që kjo procedure, e aplikuar vetëm në vendin tonë, pa rentabilitet financiaro-klinik, me hapësira të mëdha keq përdorimesh të fondeve, me një kosto shumë të lart për sistemin tonë shëndetësore etj”, është shprehur Shehu. Sipas Shehut numri i aplikimeve për check-up nga qytetarët është shumë më i vogël se ai për të cilin buxheti paguan, prandaj është vendosur arbitrarisht zgjerimi i moshave, veçse për të fshehur dështimin.

Deklarata e plotë

Qeveria vendos pa asnjë argument teknik e shkencor që mosha e atyre që përfitojnë nga i ashtuquajturi Check- Up të zgjerohet deri në 70 vjeç.

Kjo bëhet kur mbas dy vitesh që kjo procedurë, e aplikuar vetëm në vendin tonë, pa rentabilitet financiaro-klinik, me hapësira të mëdha keq përdorimesh te fondeve, me një kosto shumë të lartë për sistemin tonë shëndetësore etj, “funksionon” pa u dhënë asnjë konkluzion shkencor, klinik, financiar apo statistikor ky.

Deri më sot nuk është paraqitur asnjë publikim profesional, asnjë kumtesë apo diskutim i vlefshëm, nuk ka as edhe një analizë të mirëfilltë për këtë iniciativë të kushtueshme.

Në fakt nuk publikohen as numrat e të ekzaminuarve, që janë shumë më poshtë shifrës prej rreth 470000 qytetarë, për të cilën paguhet detyrimisht rreth 6 m euro në vit nga buxheti, si dhe as përfundimet klinike të tyre.

Në këto kushte, përsëri në mënyrë okulte, pa asnjë argument financiar e klinik, dekretohet zgjerimi i hapësirës së moshës.

Natyrshëm del një pyetje, nqs nuk shtohet vlera e pagesës ndaj kompanisë, si ndodh që ajo ta marrë përsipër këtë shtesë gratis?!

Në fakt e vërteta është e thjeshtë: Duke qenë se numri i aplikimeve për check-up nga qytetarët është shumë më i vogël se ai për të cilin buxheti paguan, gjë që nuk mund të mos krijojë probleme serioze, vendoset arbitrarisht zgjerimi i moshave, veçse për të fshehur dështimin.

Kësaj i thonë “shto miell e shto ujë”. Në fakt kjo procedurë ekzaminimesh me këtë logjikë mund të zgjerohet edhe në drejtime të tjera….! Kjo është shëndetësia falas….. pa përfitim për qytetarët…me shpenzimet e buxhetit”.

/DRONI.al/